Ultimamente tin hopi preocupacion y angustia pa e aumento drastico den prijs di awa y coriente. E subida den prijs di utilidad lo traduci den subida den costo di tur cos. E falta di hedge a condena nos pais na golpi fuerte pa presupuesto di tur famia. Berdad Aruba a yega di hedge malo den pasado dus por compronde e preocupacion ora di contrata un hedge na un prijs mas halto cu mercado. Un analisis mester a consisti di compara bahada den consumo di combustibel durante pandemia cu expectativa di demanda despues, te hasta sin guera e caso tabata existi pa hedge y esey tabata e recomendacion di WEB mes. Falta di capacidad na Utilities, probablemente danki na tur e nombracionnan politico, awe a resulta den consecuencia deplorabel pa pueblo y casi sigur sin ningun consecuencia pa esnan responsabel pa e eror.
Fracionnan di ACCION 21 – AVP – MAS a introduci dos mocion durante tratamento di presupuesto 2022 expresando nos desaprobacion riba e hecho cu no a hedge. Mocion no. 16 tabata critico “riba e hecho cu MinAIE no a informa Parlamento debidamente tocante e decision di NO hedge e prijs di FO (fuel oils) pa WEB pa aña 2022!” Mocion no. 17 categoricamente a “expresa desaprobacion riba e decision di WEB y UA (Utilities) pa NO a hedge!” Tur dos mocion a keda DESAPROBA cu 11 voto contra, di e Parlamentarionan di MEP – RAIZ. Dus pueblo tin Edgard Vrolijk, Marco Berlis, Setty Christiaans-Yarzagaray, Darlaine Guedez-Erasmus, Alvin Molina, Hendrik Tevreden, Ricky Hoek, Shailiny Tromp-Lee, Arthur Vallejo, Misha Raymond y Raymond Kamperveen pa gradici cu Parlamento no por a ni expresa desaprobacion, corda instrui e Minister pa haci otro. Dus sigur ta un pregunta legitimo si nos stempel parlement cu ta costa pueblo alrededor di 13 miyon florin pa aña no por funciona debidamente?
E decision di a keda sin hedge kier men cu e aña aki pueblo lo no solamente paga tarifanan hopi mas halto pero tambe no lo por goza di stabilidad di prijs creando mas incertidumbre den temponan dificil. Na september e prome aña Parlamentario lo yega su fin y ni un solo mocion of amienda di oposicion (ACCION 21 – AVP – MAS) a ser aproba. E gran logro di nos coleganan otro banda cu 11 asiento pero menos voto, ta obstrui tur intento di oposicion pa mehora ley of maneho, paso al final defende nan gobierno ta mas importante cu defende pueblo. Nos ta compronde paso si nan gobierno bay cas probablemente nan tur lo perde nan trabao. Desafortunadamente Parlamentarionan di coalicion no ta limita nan obstruccion na para tur iniciativa di oposicion. Apesar cu Presidente di Parlamento actual a vocifera cu e lo priorisa independisacion di Parlamento, e comicion special pa trata esaki no a reuni ni un solo biaha.
Ruman di ex-Presidente di Parlamento ta aparentemente encarga cu dicho independisacion y ta mantene un oficina na Parlamento aunke ningun hende sa kiko e ta haci. Su ex-cuña, Director di DRH, mester a dune un positief advies pa haci e trabao, algo cu mi a solicita hunto cu cualkier rapport cu ela traha pero ainda mi no a haya nada. Ta e mesun Director di DRH cu a caba di permiti pareha actual di su ex-casa permiso pa traha fe Hulanda como ambtenaar, e hipocresia y abuso di poder no tin fin. E Comicion Fiho di Parlamento pa Noord Amerika NUNCA a yega di reuni y asina e posibilidad di cera lasonan cu Congreso Americano ta keda pendiente despues di bishita di algun Senador Americano na nos isla basta aña pasa.
Dia 21 maart 2022 mi a pidi sra. Tromp-Lee, voorzitter di Commissie Koninkrijks Aangelegenheden en Buitenlandse Betrekkingen (CKABB), yama un reunion di e comicion fiho pa discuti un mocion pa suspende miembresia observador di Rusia y Belarus na Parlatino despues cu guera a cuminsa y mi no a ni haya contesta. Ariba e mesun 21 maart 2022 mi a pidi sr. Kamperveen, voorzitter di Commissie Milieu (CM), yama un reunion di e comicion fiho hunto cu Hefe Afdeling Inspectie DNM mirando cu ningun process verbal (PV) ta ser otorga y te awe mi ta wardando un contesta. Ignora peticionnan di miembro di Parlamento di oposicion, blokea tur mocion y amienda di oposicion y nenga informacion riba presupuesto di Parlamento ta algun di e logronan cu lo hiba nos pais dilanti segun Parlamentarionan MEP – RAIZ. Un comentario cu mi ta haya hopi ta baha gobierno pa caba, kere mi si mi tabata por e gobierno aki lo a bay cas dia bieu. Ta un di e 11 Parlamentarionan di MEP – RAIZ so por manda e gobierno cas paso ta nan ta mantene nan na poder apesar di deal cu Eagle LNG, fraude den FASE, recomendacion pa aanwijzing di CAft etc. etc. etc.
No ta solamente nan trabao ta na peliger si Parlamentarionan di MEP – RAIZ bay contra gobierno, hopi di nan ta sinta ta warda nan dia di cobra un directeurschap den un departamento di gobierno of otro funcion den sector semi-publico. Te hasta tin cu ta admiti di a drenta politica simplemente pa logra avansa nan propio carera. Reforma di nos sistema electoral ta keda primordial pa cuminsa drecha un sistema kibra cu ta traha contra di e interes nacional. Mientras esey ta sosode por eherce curashi y haci miho uso di e comicionnan fiho di Parlamento. Actualmente nan ta traha unicamente reactivo lugar di proactivo mientras nan tin e potencial di ta e miho garantia pa continuinidad di maneho. Si nos kier mehora nos sistema ban cuminsa eherce curashi y otorga tur voorzitterschap na miembronan di oposicion pa sikiera e comicionnan cuminsa funciona manera debe ser. Den un mundo ideal e Parlamentarionan miho cualifica den un materia lo ser apunta voorzitter di e respectivo comicion pero na Aruba nos ta leu di e tipo di profesionalismo cu lo miho sirbi nos pueblo.
