Nos Pais Television ta atkerí derechi históriko i eksklusivo pa transmití Seri di Karibe

Kanal di televishon Nos Pais i su direktora Mavis Albertina,  ayera durante un rueda di prensa a anunsiá ku islanan di Kòrsou, Aruba, Boneiru i Sint Maarten, pa promé biaha den historia, por mira selekshon di Kòrsou partisipá na un Seri di Karibe di beisbòl. E kanal di televishon lokal, ofisialmente a atkerí derechinan eksklusivo pa transmishon di tur wega durante e torneo di beisbòl mas grandi den Karibe i Latino Amérika.

Seri di Karibe 2023 ta un evento deportivo di beisbòl profeshonal ku lo tuma lugá di 2 pa 10 di febrüari 2023, na Venezuela den stadionnan La Rinconada (Caracas) i Forum (La Guaira). E seri ta reuní den un torneo final, ekiponan kampeon profeshonal di Venezuela, Repúblika Dominikana, Cuba, Puerto Rico, Mexico, Panamá i Colombia. I pa promé biaha den historia nos dushi Kòrsou ta partisipá. 

E klásiko karibense i latino amerikano ta drenta su di 65 edishon i pa Kòrsou esaki ta un desaroyo históriko. Kòrsou ta hunga un kantidat di 7 wega preliminar durante e promé rònt i ku bon resultado lo hunga ròntnan di ‘play off’: (athunto konekshon di e kalènder i wepsait ofisial)

https://www.seriedelcaribe.net/articulos/calendario-serie-del-caribe/

https://www.seriedelcaribe.net/

Bo kanal di televishon, Nos Pais, den un logro históriko i eksklusivo ta trese tur wega durante Seri di Karibe, den bo kas. E posibilidat a bira un realidat na momento ku direktora di e planta, Mavis Albertina a firma ku representante di e Konfederashon di Beisbòl Profeshonal Karibense. Un kantidat di 32 wega lo pasa via kanal Nos Pais for di kual 7 ta weganan ku Kòrsou mester hunga durante e ròntnan preliminar, pendiente un klasifikashon. Klasifikashon ta enserá, 2 wega adishonal mas pa e selekshon di Kòrsou, via bo kanal Nos Pais. Un grupo bastante grandi di hungadónan profeshonal Yu di Kòrsou na Estádos Unídos i demas kampeonatonan internashonal a konfirmá nan partisipashon, inkluso Jonathan Schoop, Cedanne Raphaela, Shairon Martis i Hendrik Clementina. I di Aruba Ray Patrick Didder i Ryan Hunington. 

Gobièrnu di Kòrsou tambe a duna un aporte sin kondishon pa logra trese e evento deportivo via e kanal pa tur kas na Kòrsou. Ministerio di Asuntunan Ekonómiko i su Minister Ruisandro Cijntje,  a duna Ofisina di Turismo e tarea pa keda enkargá ku e.o. promoshon di e evento i sosten logístiko, mientras minister Sithree van Heydoorn pa e parti di Deporte. Kultura i Formashon tambe a duna nan sosten.

Minister di deporte di Aruba, Endy Croes a keda sumamente enkantá ku e gesto di Mavis Albertina pa brinda e Pueblo di Aruba e weganan kompletamente grátis komo gesto di agradesimiento pa e sosten ku nos tim ta risibí di e hungadónan di Aruba i ta sostené nos ekipo di Kòrsou. Kanal 23 lo karga e señal den kadena ku Nos Pais i ta transmití tur 32 wega. Meskos ta konta tambe pa kanal 20 di Telbo Boneiru i nos kanalnan riba Telem i WTN na Sint Maarten.

Nos Pais alabes ta gradesí su patrosinadónan di e proyekto históriko aki, ku ya kaba a konfirmá nan sosten manera entre otro Guardian Group Fatum i Ministerio di Enseñansa, Siensia, Kultura i Deporte. E danki spesial ta bai tambe pa CINEX, Analytisch Diagnostisch Centrum (ADC), Curoil, Bureau Telecommunicatie en Post, Licores Maduro i Refineria di Kòrsou. Finalmente un pabien i danki ta bai pa e pueblo di Kòrsou ku e gran logra aki. 

E Tim di Transmishon na Venezuela pa kanal Nos Pais ta kargá ku eksperensia internashonal. E ta konsistí di naradó,  Alexander Makaja, komentarista Clarck Zalm kendenan lo biaha huntu ku téknikonan, Robert Emperador i Tom Allen pa Venezuela. Na Kòrsou den studio e tim ta risibí sosten di Gino Valeriaan, Jair Quand i Rafelito Jozefa. Tambe Edson Kelly di Aruba i Kumar Piar di Boneiru lo reforsá e tim. E kas produktor di kontenido, KONTENTU ta enkargá ku planifikashon i ehekushon logístiko di e proyekto na Venezuela.