E realidad ta cu gobierno no por haci e proceso pa drecha caya principal Oranjestad su so, pero tampoco e comerciantenan local no por haci esaki su so, mester ta uni y ta un team pa haci esaki posibel. Pesey mes CUA a tuma e decision hunto cu su miembronan pa acerca gobierno y manda e mensahe cu e deseo t’ey, pero tin miedo pa wak inversionnan mes un cos cu a wak den pasado y despues caba na nada. Sinembargo kier ta sigur cu e biaha aki e mes un situacion no pasa. Comerciantenan kier haci e inversion aki y kier ta sigur cu esaki ta bay bira un exito.
Renobacionnan cu tin den construccion awe ta hopi den caya principal, actualmente tambe tin construccion andando. Sinembargo tin un cantidad di proyecto cu tambe ta bay start, diferente proyectonan den caya grandi cla pa cuminsa construi pa engrandece e capital di Pais Aruba.
Si haci e inversionnan aki den caya na momento cu un turista pasa e ta bay haya full un otro imagen di Pais Aruba. E proyectonan cu a keda presenta ta proyectonan cu ta cla pa cuminsa construi. Porehempel edificio di galeria moderno a caba di wordo cumpra y si hende ta cumpra e edificionan den caya ta paso e comerciantenan Arubiano ta kere den e proyecto y nan ta kere den Aruba.
Tur e proyectonan cu a presenta ta di miembronan di comerciante Uni, pero ainda tin mas. E bunita di e proyecto di caya principal ta cu tur e proyectonan ta di inversionista di comerciantenan local. Pesey mes t’ey awe y a presenta e idea y ta kere cu hunto cu comerciantenan Uni , banconan local y gobierno hunto por haci algo pa por logra engrandece e centro di ciudad di Aruba y lage florece manera mester ta pa e bishitantenan por gosa di esaki y Aruba por ta orguyoso di su caya principal.
Gobierno por tuma tres pa 4 aña pa e por inverti y logra un proyecto e no ta haci un efecto riba gobierno, pero e comerciante no por haci esaki, un inversionista cu tin un financiamento por carga mas tempo , pero e inversionistanan cu tin mester di e banconan local no por tin dilemanan cu ta tarda pa construi. Si e inversionista ta bay traha cu banco pero gobierno ta tarda pa haci procesonan di permiso e propio gobierno ta kibra e comerciante prome cu e cuminsa.
Pesey mes a haci un yamada na gobierno principalmente minister di economia Geoffrey Wever cu comerciantenan mester di ayudo pa tur cos cana segun tempo. Tin diferente puntonan cu mester por evalua mirando cu no por puntra un comerciante di nan mapa di nan edificio cu ta di 100 aña pasa paso nunca lo haya esaki y of e no lo ta existi mes. Lamentablemente tin inversionistanan cu a bin cu bon intencion pa inverti, pero cu a bay bek debi cu ta un dolor di cabes pa procesonan tuma luga pa preguntanan y of informacionnan stupido.
Sinembargo ta kere mester motiva cierto informacionnan , porehempel si no tin mapa debi cu e edificio ta di mas cu 100 aña pasa e ora por bin haci un examinacion pa asina cosnan sigui cana. E motibonan aki tin henter caya principal stanca debi cu inversionista ta haya su mes blokia cu procesonan cu mester tuma luga.
Pesey mes e yamada na gobierno pa kita e red tape paso tin mester di un solucion pa yuda e inversionistanan local di loke ta stroba y of e departamentonan concerni di gobierno cu mester haci e proceso posibel pa no keda stanca e proceso pero pa busca solucionnan pa logra y haci posibel pa comerciantenan por logra. Con nos ta logra esaki ? solamente si nos traha hunto. E inversionnan cu lo keda haci den caya grandi ta inversionnan di miyones cu por ta posibel si tur cos cana manera mester ta.
