Nos por bisa cu Aruba ta casi full den su normalidad, tur mucha ta bek na scol y mayoria companianan a cuminsa opera den tur nan normalidad. E aña cu nos tin nos dilanti ta papia di aña di celebracion unda cu Aruba su carnaval lo celebra 70 aniversario.
Esaki ta un momento pa celebra pero manera semper tur cos dushi ta bin cu su consecuencianan. Embaraso Hubenil ta un punto cu ta keda di preocupacion pa diferente instancianan , principalmente Witgele Kruis den un sistema di carrousel a yega di bishita diferente scolnan na Aruba unda cu ta informa e muchanan principalmente esunnan cu ta sali di 6de klas pa cuminsa bovenbouw cu nan ta haya informacion con pa nan cuida nan mes y cu nan preveni pa sali na estado.
Sinembargo no ta pa sali na estado so pero na mes momento e malesanan contagioso tambe ta hunga un rol den e parti aki. Witgele Kruis den pasado a yega di participa den e sistema di carrousel y ta mira e impacto cu e ta haci. Den e periodo cu e muchanan ta bay bovenbouw e acto sexual no ta abao.
Ya caba tin algun scol cu a cuminsa acerca diferente instancianan unda cu ta haci diferente charlanan durante henter e aña na diferente scolnan. Aki ta caminda e contacto cu e muchanan ta cuminsa y e muchanan mes ta haci diferente pregunta nan.
Hopi ta e preguntanan y mayoria ta papia riba e anticonceptivo con e ta wordo uza, e muchanan ta haya splicacion di esaki door di e sistema di carrousel, pero na mes momento ta pasa e hobennan over pa famia planea unda cu nan lo haya un splicacion mas specifico den loke ta nan pregunta.
Den e edad nan di 15 pa 16 aña tin preguntanan di duda tambe, riba ki decision nan lo por tuma na momento cu mucha homber nan acerca nan y ta basila y ta papia cu nan ta stime y cu e kier ta cu ne. Aki ta caminda cu e hobennan ta haya diferente tip con nan mester atende cu cierto preguntanan cu e mucha homber nan ta bin cu ne. Tambe den e sistema di carrousel ta trece diferente casonan padilanti y duna ehempel con nan por sali di e situacion sin ningun problema.
Tambe ta papia di e norma y balornan cu nan ta siña na nan cas y pa nan implementa esaki den nan bida diario , paso ta esey ta e educacion nan ta haya for di cas. E parti di educacion na cas ta hunga un rol hopi grandi riba decisionnan cu e mucha por tuma na momento cu e ta cana su so of cu e ta cu su amistad nan.
Cada mucha ta diferente y cada caso ta apart, cada hogar tin nan norma y balornan y aki ta caminda cu por mira con e mucha ta implementa esaki di su mes pa su mes na momento cu e ta pafo di cas. Importante ta cu e mayornan por papia cu nan yiu , busca informacion hunto cu ne pa nan sa na momento cu nan curpa ta cambia y nan celebro ta cambia y asina nan amigonan ta bira e influencia e ora.
Sinembargo si cada mayor a forma nan yiunan e parti aki no mester ta un preocupacion debi cu tur cos ta depende di e forma cu nan a hinca e norma y balornan den nan yiu. Tur mayor ta importante y pesey ta hopi bon pa mayornan tambe sigui busca informacion principalmente den e mundo di awendia cu ta hopi desaroya. E miho conseho ta pa tin confiansa cu bo yiu y asina bo lo por yude y guia e hoben den un miho manera pa su futuro. Carnaval ta den porta y nos tur hunto mester contribui pa nos hobennan no sali na estado na un edad hoben unda cu nan lo perhudica nan futuro y nan estudio.
1 comment
[…] Source link […]