Nos kier bay Venezuela : Grupo di Venezolano ta denuncia publicamente mal maneho di aerolinea Laser

Grupo di Venezolano na Aruba cu mester a bay den un vuelo humanitario di regreso boluntario pa Venezuela no a logra haci nan vuelo ultimo. Sinembargo ayera mainta nan tur a prepara pa  atende cu nan situacion na consul di Venezuela na Aruba pa nan regreso pa Venezuela.

E vuelo na prome instante mester a tuma luga dia 7 di maart pero a hala esaki pa dia 20 di maart pero cu tampoco no a sali. Loke cu e grupo ta lamenta cu e cancelacion di e biahe no a keda avisa na nan door di e compania cu nan a cumpra nan ticketnan di vuelo cu ta  e aerolinea laser.

Segun e grupo esaki no ta e manera y no ta e sistema tampoco y ta pa e motibo aki mes cada un di nan a bin na consul di Venezuela na Aruba pa asina nan busca nan derecho. No tin claridad y tin hopi abuso a tuma luga cu e aerolinea Laser . Loke cu tambe ta nan preocupacion ta e prueba di e COVID cu ya caba nan a haci y mester a paga 75$ cu pa hopi di nan ta un suma halto y dificil pa por a logra haya prome cu nan mester a haci nan vuelo.

E vuelo humanitario ta un vuelo cu mester a keda haci for di dia 7 di maart despues a cambia pa 14 di maart y despues tabata dia 20 di maart pa na momento cu e fecha a yega tur a bay haci nan test di COVID pa asina e keda entrega na e exigencianan stipula. For di 8 or di mainta e grupo tabata programa pa bay aeropuerto y pa haci nan check in y e check in a keda haci prome cu 8 or di mainta caba .

Tin un cantidad di mas cu 140 pa 170 pasahero incluyendo esunnan cu ta di guarda nos costa , tambe tin un otro grupo cu tambe a pasa paden unda cu nan ta warda e avion parti di paden den e porta A, pero cu nan mester a bolbe bek pafo.  E paspoort di e personanan aki a keda controla y tambe a stempel y tambe nan a firma un documento cu ta skirbi na Hulandes sin hopi splicacion cu nan ta sinti cu ta un abuso tambe di parti di inmigracion pa no splica loke cu tin riba e documento skirbi.

E grupo di Venezolano tabatin mas cu 12 ora ta warda na aeropuerto sin ningun respuesta  concreto. E grupo di Venezolanonan aki tabatin un grupo di whatsapp di parti di e aerolinea laser cu ta e manera cu e aerolinea ta comunica pa tin informacion di e ticket pero tambe informacion di e test di COVID.

Sinembargo e grupo di whatsapp aki no a duna ningun momento un aclaracion di e situacion di e grupo di Venezolanonan cu mester a bula dia 20 y nan ta urgi pa e agencia di aerolinea Laser atende cu e situacion aki debi cu nan tur ta desea di bay bek Venezuela. Nan a prepara pa bay bek y esaki ta significa cu hopi di nan no tin apartamento y of cas ta huur mas y tampoco no ta trahando mas.

E grupo kier un solucion pa nan situacion y ta haci un apelacion na consulado de la republica bolivariana de Venezuela, comunidad di Aruba, gobierno di Aruba pa nan apoya nan debi cu nan kier bay bek nan pais . E grupo di Venezolanonan tabata bon cla cu nan no kier placa nan  kier solamente bay for di Aruba.

Ta haci un apelacion na un representante di aerolinea Laser pa sali padilanti y atende cu e situacion aki y duna nan un disculpa di e situacion cu ta pasando. Henter e grupo a paga nan ticket y tambe nan test di COVID cu ya caba a keda venci pa 8 or di anochi y pa es motibo aki mes nan kier nan placa bek pa por haci e test dinobo y pone un fecha pa nan vuelo cu mester a tuma luga dia 29 di maart ultimo. Actualmente nan a crea un chatgroup entre Venezolanonan mes unda nan ta yuda un cu e otro, pero e situacion ta hopi incomodo. E grupo di Venezolano ta declara publicamente cu e ta haci e aerolinea Laser culpabel di tur e situacion cu nan ta pasando y cu nan lo mester bay paga pa e daño cu nan a comete.