Presidente di Nos Kier Boneiru Bek Sr James Finies I Bonaire Human Rights Sra Davika Bissessar ta na New York pa e apertura di e di 77 Asamblea General di Nashonan Uni en representashon di nos pueblo komo sosiedat sivil pasobra nos pueblo Boneriano no tin representashon. Esaki ta un ekselente oportunidat pa informa mundu tokante Estado Hulandes su kontinou violashonan di nos derechonan humano sagrado I inalienabel di outodeterminashon kual di ningun manera por desvia for di nan. Awe ta marka di 218 dia riba e pelgrimage luchando pa hustisia; Sosial, Politiko, Konstitushonal, Kultural I Ekonomiko den e status kolonial ku e pueblo Boneriano den referendum di 2015 ku 65.6% voto No, rechazando e status konstitushonal illegal impone riba e pueblo di Bonaire na 10-10-10.
Nos delegashon a sali for di Boneiru riba 16 di februari I awor mas ku shete (7) luna kontinou riba e mishon pa konsientisa I buska apoyo I solidaridat pa e kaso di Boneiru. Nos a partisipa den varios konferensia internashonal global I a reuni ku lidernan, gobiernonan I institushonan den Amerika Latino. Niun di nan no tabata sa o a tende di Boneiru prome. Awor lidernan I gobiernonan di Mexico, Honduras, Belize, Panama, Costa Rica, Salvador, Colombia, Venezuela, Peru, Ecuador, Bolivia, Paraguay, Uruguay, Brazil, Argentina I Chile tur sa I ta den solidaridat ku e pueblo di Boneiru.
Prinsipio di Juli nos a bai na e di 43 Konferensia di CARICOM di Hefenan di Estado na Surinam kaminda ku nos a presenta e kaso di Boneiru I nos raport di Investigashon di Propio-Gobernashon na Prome Ministernan I Presidentenan di paisnan di CARICOM I na e Sekretario General di Nashona Uni Sr Antonio Guterres. Seguidamente nos a kontinua e pelgrimahe den Karibe Oeste I a partisipa den konferensia global riba reparashon na Barbados, a reuni ku lidernan I gobiernonan. Despues sigui pa San Vincente I Grenadines I Grenada. Na kuminsamentu di September nos a sigui direkshon di Washington DC I awor nos ta New York trahando ku Mishonan di e paisnan aki na Nashonan Uni tokante e relisting di Boneiru.
Nos speransa ta haltu ku nos sakrifisionan I esfuersonan di lobby di ultimo lunanan pa nos trajektoria I obhetivo pa e kaso di Boneiru pa wordu pone bek riba lista di Teritorionan-Sin-Propio-Gobernashon di Nashonan Uni tin posibilidat grandi di wordu presenta den e periodo benidero di e 77 Asamblea General di Nashonan Uni ku a kaba di kuminsa e siman aki.
