ORANJESTAD, Aruba
Parlamentario drs. Mervin Wyatt-Ras a trece padilanti cu minister Dangui Oduber no ta importa ken ta ser afecta cu medida di AZV. E siman cu a pasa e comision di Asuntonan Social y Salubridad a delibera cu Aruba Dental Society
(ADS). Nan a manda un carta pa Parlamento expresando nan preocupacion pa loke ta trata nan practicanan di tur dia y e medidanan di AZV ariba nan pashentnan. Segun e carta pashentnan di 17 anja y mas bieuw lo mester entrega un eigenbijdrage pa tratamento ora tin dolor di djente, infeccionnan den boca y garganta y ora di pone plancha di djente y beugel. Pashentnan lo mester paga 100% di e gastonan. Esaki sigur lo afecta pashentnan cu tin limitacion financiero of di menos recurso, especialmente den e temponan aki cu hopi hende, pa ta mas exacto 37.000 persona, no tin entrada. E dunadornan di cuido aki lo entrega alabes 5.5% di nan entrada. Dor di falta cifranan encuanto entradanan y gastonan di AZV ADS a consecuencia di COVID 19 no por indica exactactamente ki e consequencianan financiero ta pa e praktijken di dentistanan.
Increible ta cu AZV ni e minister encarga cu Salubridad Dangui Oduber no ta consulta ni delibera cu dunadornan di cuido sino na un forma dictatorial ta dicidi y pone nan na haltura. Ademas e medidanan lo ser implementa cu terugwerkende kracht entrante 1 di juli. A drenta alabes un carta Parlamento di diferente otro dunadonan di cuido manera Dokternan di Cas ((HAVA), Specialistanan (VMSA), IMSAN, Respaldo, ASHA y SZA. Den nan carta nan ta expresa nan preocupacion pa introduccion di eigenbijdrage pa por mira un specialista. Aki ta trata un suma di 10 florin. Segun nan opinion esaki lo afecta pashentnan di menos recurso cu no lo bishita un specialista pa falta di medio financiero dor di cual nan malesa lo por bira peor cu tur su consecuencian. Aki por nota cu medidanan lo afecta mas tanto nos hendenan cu no tin mucho recurso. Wyatt-Ras kier trece su desapunto padilanti den e minister encarga cu Salubridad cu no ta duna cara. Wyatt-Ras y otro coleganan a manda varios pregunta pa e minister contesta encuanto di AZV y e consecuencia di COVID ariba liquidez di e aseguro medico aki, sinembargo te dia di awe ni foe ni fa. No ta haya contesta di e minister ariba e preguntanan. Esaki ta muestra di falta di respet y falta di capacidad di e minister. E minister aki solamente ta sali den prensa pa anuncia cosnan bunita, esta ora casonan di COVID a baha te 0, ayudo ricibi di Hulanda di material y personal pa ICU, ki dia lo habri frontera etc. Ora ta trata situacionnan dificil e ta bira mescos cu Avestrus y ta skonde su cabes bou tera ora tin situacion dificil of problema.
Wyatt-Ras ta spera cu awor si e minister por bin duna cuenta na Parlamento di kico ta pasando den AZV. Si mester baha gasto mester cuminsa serca su mes y su gastonan di luho, contractnan di famia y amigonan y otro gastonan di operacion di gobierno. Paso si sigui asina nos hendenan humilde y di menos recurdo no por bai ni specialista ni djentista mas.