Den un encuentro ameno ayera a culmina e prome cyclo di 12 siman di e programa Nos
Amistad, cu a cuminsa e prome siman di juli despues cu e boluntarionan a sigui un curso
specifico pa cu esaki.
Durante 12 siman largo e boluntarionan Mena, Carmita, Mildred, Margarita, Mercedes y
Richard a bishita un grandi di e barionan di Pos Chikito, Noord y Tanki Leendert, cu tawata
sinti su mes un poco isola motibo di e.o. e pandemia, cu no por a sali y topa otro hende y
mas tanto tawata sera den cas pa cuida curpa. Bou guia di nan mentornan, nan a ehecuta e
programa aki. E mentor tawata e persona di confiansa di e boluntario y hunto tawata
prepara e siguiente bishita y tambe ta evalua despues di cada encuentro. A evalua e prome
cyclo, unda nos boluntarionan cu nos a yama Nos Amistad, por a trece nan experencia, e
deseonan di e grandinan cu nan bishita y nan recomendacionnan pa un proximo cyclo cu ta
programa pa otro aña.
Na comienso di e encuentro coordinadora di e Proyecto Hunto Grandi, Grandi Hunto Sra.
Rosa Leon a dirigi algun palabra na e boluntarionan y mentornan. A gradici nan pa nan
cooperacion den e Proyecto bunita aki pero tambe a trece dilanti cu nos tur a siña di e
Proyecto aki cu ta unico den su forma. E boluntarionan a trece alegria bek serca e grandi cu
tawata isola. E boluntario di su banda por a conta cu un mentor cu tawata para su tras pa
cualkier informacion of duda cu e tawata tin. Asina hunto cu e coordinador, tur a traha
hunto na bienestar di nos grandinan.
Sr Rudy Leysner, president di Fundacion Movemento ta bida tambe a gradici e
boluntarionan, mentornan y coordinadora pa e bunita programa aki. Ta basta aña caba
tawata preparando pa e programa aki cuminsa y awor porfin por a realisa esaki cu ta un
necesidad hopi grandi mes, mas awor cu e pandemia. E parti di combati soledad entre nos
grandinan mester sigui wordo atendi na un escala mas grandi paso e soledad ta bai keda
como cu nos comunidad ta birando mas bieu mas largo.
Pa locual ta e grandinan por lo general tawata di alegria, di por a haya bishita di esnan cu
tambe ta grandi, di hasi actividadnan hunto na cas mes. A pasa e maintanan o sea
desayunado hunto unda cu te hasta tawatin chuculat pinda, hasiendo weganan di mesa
manera Rummikup, cantamento hunto, hasiendo obra di man, combersa y duna atenshon
na otro. E boluntarionan a haya e guia di e mentornan hopi bon, como cu nan tawata sinti
nan mes mas sigur di e trabou cu nan tawata bai hasi. E comunicacion tawata hopi bon
entre mentor y boluntarionan. Loke a resalta ta cu no ta un grandi so tawata interesa, pero
a invita un, dos y hasta mas grandi pa comparti hunto e mainta informal. Importante
tawata tambe cu si a palabra cu por ehempel ta bishita e grandi riba un diabierna, ta sigui
bishita riba tur diabierna y asina e grandinan tawatin e siguransa cu e bishitanan ta
continua. Recomendacionnan di parti di e boluntarionan tawata riba diferente tereno. Sigur
ta pidi pa sigui cu e encuentronan y bishitanan na cas. Famianan mes por organisa esaki
den nan seno pa bishita nan grandinan un bes pa siman pa pasa un rato agradabel cu otro.
Tambe por hiba un grandi bai keiro y come algo y pasa tempo hunto.Directiva di FMTB,
coordinador di Proyecto Hunto Grandi Grandi Hunto y mentornan pa medio di esaki ta
gradici e boluntarionan masha hopi mes di pone nan mes y nan tempo disponibel pa e
bunita programa aki unda a trece alegria bek serca e grandinan cu ta esnan cu ta mas isola
den e temponan aki.
