Den su programa semanal di Hallo Minister Lampe e mandatario a elabora riba su maneho pa inverti eficientemente den enseñansa creando resultadonan faborabel y riba e “doorlichting” cu lo bai tuma luga den enseñansa awor cu Aruba y Hulanda a yega na un acuerdo cu otro pa sosten financiero den forma di un “zachte lening.”
Minister Lampe a elabora cu un di e definicionan di corupcion ta “ondoelmatige investering.” Esaki ta cu bo ta haci uso ineficiente di e inversion cu placa di pueblo, den otro palabra bo ta malgasta cu placa di pueblo. Paso e inversion cu bo ta haci no ta dunabo e resultado cu ta coresponde na e inversion aki.
Pesey dentro di e Ministerio di Enseñansa desde inicio di gobernacion Minister Lampe a cuminsa tuma sierto accionnan al respecto.
“E ta logico cu nos no tin cu warda Hulanda bin hacie pa nos” e mandatario a enfatisa.
“Nos mes mester a cuminsa haci e pregunta loke realmente World Bank a conseha tur gobierno, pa nan evalua un rato si e placa cu ta hinca den enseñansa ta hiba na un miho calidad di enseñansa”.
E pregunta ey Minister Lampe y su team a haci e temponan aki y pesey a tuma sierto desicionan pa kita tur loke ta uso ineficiente di e placa di pueblo y sperando cu loke a spaar eynan por hinke bek den enseñansa pero si di un manera mas eficiente cu lo tin miho resultado.
Ministerio di Enseñansa, Ciencia y Desaroyo Sostenibel a start e proceso ey y en berdad manera ya ta conosi a logra spaar 25 miyon di cua ta inclui e 12.5% cu nos ambtenaren y maestronan a entrega dor di solidaridad cu e situacion di Covid-19. E intencion tabata pa e plaka aki cu a logra spaar pa hinke bek tambe den enseñansa. Lamentablemente Covid a dal duro y a hasi cu e plan pa reinverti eficientemente bek den enseñansa no a concretisa. E placa a bai entre otro pa paga Fase. Esaki Minister Lampe a mira como un bon uso di e placa aunke cu esaki no a bai directamente den enseñansa.
“Pone pan riba mesa den hogarnan ta un prome condicion di tur cos, paso un mucha cu hamber no por siña” Minister a vocifera.
Minister Lampe a elabora tambe riba e doorlichting cu lo bai tuma luga den enseñansa awo cu Aruba y Hulanda a yega na un acuerdo cu otro pa sosten financiero den forma di un “zachte lening.”
E meta di e doorlichting aki lo ta pa sigura cu e sistema di enseñansa realmente ta cumpli cu sierto exigencianan. Un aspecto cu sigur lo bai pone ariba mesa ta e tema di doelmatigheid di inversionnan den enseñansa. Bo tin cu wak ki resultado e placa cu bo ta hinca den enseñansa ta duna y si e calidad di bo educacion ta iguala cu e cantidad di placa cu bo ta hinca den bo sistema di enseñansa.
Un rapport recien cu a evalua e grado di exito di nos studiantenan cu ta stroom door bai Hulanda pa sigi nan estudio a indica cu solamente 25% di studiantenan ta termina nan estudio. Studiantenan no ta caba nan estudio pero si ta keda cu debe grandi. Otro estudio a indica cu studiantenan di Sint Maarten y Corsou ta score miho cu Aruba. Esaki ta indicacion tambe cu tin algo cu no ta bayendo bon den nos sistema di educacion akinan na Aruba. E inversionnan no ta dunando e resultadonan necesario pa loke ta educacion di nos muchanan.
Minister a clausura e topico aki bisando cu nos mester ta enfoca cu e inversion cu nos ta hasiendo den nos enseñansa en berdad tin un miho resultado y ta mehora e calidad di enseñansa akinan na Aruba. Esakinan ta temanan di sumo importancia y pesey ta spera cu den e proximo dianan lo por duna mas informacion y cu tur hende ta compronde tambe realmente loke ta e topico di “doorlichting.”
