Riba djaweps, 15 di ougùstùs 2024, entidat públiko Boneiru a desvelá
nòmber nobo di un kaya na honor di Leonardo Saturnino ‘Goi’ Coffi, un polis distinguí i
kerí den nos komunidat den añanan ’50 di siglo pasá i mas. E kaya ku ta situá serka di
Ofisina di Duana awor ta karga e nòmber “Kaya Leonardo Saturnino ‘Goi’ Coffi” komo
rekonosementu pa su kontribushon na nos komunidat.
E proposishon pa duna e kaya akí nòmber di Goi Coffi a bin for di e historiadó, Bòi Antoin.
Durante e seremonia miembronan di famia Coffi a ekspresá nan graditut i orguyo: “Nos
komo yunan, ñetunan i bisañetunan, famianan i konosínan ta hopi kontentu ku nos mama
D. L. Coffi Green na un edat haltu, faltando 8 luna pa yega 100 aña, por presensia e akto
akí di duna un kaya nòmber di su kasá, nos tata stima.”
Goi Coffi tabata un polis ehemplar ku tabata para pa integridat, hustisia i kompashon den
komunidat boneriano. Goi Coffi semper tabata bai un paso mas leu ku su obligashonnan
tabata rekerí. Sea pa medio di donashon, hiba lucha pa hustisia òf simplemente duna un
man di yudansa na esnan ku mester. Despues di a kumpli hopi aña komo polis, Goi Coffi a
traha tambe komo dùrwarder.
E nòmber di kaya nobo, Kaya Leonardo Saturnino ‘Goi’ Coffi, ta sirbi komo un rekordatorio
di e balornan ku ta representá un bon boneriano i pa sigui honra su memoria.
