Candelchi, Squirrelfish, Holocentrus adscensionis:
Candelchi ta eigenlijk referi na henter e famia di candelchi of otro bisa, ora nos bisa candelchi, nos kiermen varios diferente especie pero cu no ta distinguinan pa especie. Den e potret aki, nos ta mustrando esun mas comun den nos awanan cual ta e asina yama na ingles, squirrelfish of bou nomber cientifico Holocentrus adscensionis. Bou candelchi, nos na Aruba generalmente ta referi na tur e diferente especienan di candelchi. Tur ta parce otro y emberdad ta dificil distingui entre nan.
E famia candelchi e ora ta keda distingui pa e siguiente caracteristicanan. Nan ta cora te cu roos di color y hopi biaha ta mustra manera strepi di cora entre e scamanan a lo largo di e curpa. Nan tin spina duro y semper arma. Na hermana isla Corsou, sa yamele bari di clabo, pa e motibo ey.
Den nos awanan tin 7 pa 8 tipo of especie presente y cu sa ser gara y mira ocasionalmente. Por distingui nan pa diferente marca manera color na spina dorsal of marca na curpa. Den e articulo aki no lo profundisa den esey.
Na Aruba:
Candelchi ta ser cara riba rifnan of areanan cu structura den awa unda nan por sconde. Aunke nan ta prefera busca nan cuminda anochi, nan ta activo den dia tambe. Nan ta comible y ta dushi hasa seco bros cu su lamunchi. E ta peculiarmente desafiante pa scama e pisca y pesey e no ta un di e preferinan cerca piscadonan. Nan ta biba hopi biaha den grupo.
