Kiko ta okashoná subidanan di preis.
Hopi diskushon tin i lo bai tin pa loke ta subidanan di preis den e tempunan benidero riba nos isla. Komunidat ta konstatá ku preisnan di produkto i servisio lo subi i lo sigui subi den e tempunan nenidero. Ta bon pa nos komprondé kiki ta kousa ku preisnan ta subi i lo sigui subi
• Preisnan di e produktonan básiko i preisnan di e materia prima pa traha produkto ta subi mundialmente.
• Materialnan di empake, manera plèstik, karton i palu ta subi.
• Gastunan di transporte ta subi pa motibu ku kombustibel su preisnan ta subi.
• Preisnan di energia, esta awa I koriente ta subi
• Inflashon ta oumentá.
• Boneiru ta dependé di importashon
Pa e motibunan aki, hopi komersiante lo tin ku subi nan preisnan si nan kier sobrevivi. Awor nan por hasi esaki na dos manera, esta
1. Subi e preisnan di gòlpi òf
2. Subi e preisnan den fase.
Kualkier di e dos opshonnan ku nan skohe lo ta rekomendabel pa nan komuniká na tempu ku nan kliente. Nan no mester di konta tur nan selashi di negoshi, pero si ta bon pa nan komuniká i asina e kliente tin mihó komprenshon pakiko ta inevitabel ku e preisnan di produkto i servisio lo subi.
Kiko komersiantenan por hasi.
Nos komersiantenan ku ta hasi negoshi por será kabes i lanta un organisashon konhuntamente ku ta importá e produktonan básiko na bulk. Esei lo influenshá e preisnan favorablemente.
Komersiantenan por pone preshon pa realisá un haf di konteiner aki na Boneiru pa asina baha e preis di transporte ya ku por importá direkt o no via via ku ta kousa mas gastu adishonal.
Komersiantenan por buska merkadonan den región ku ta bende e produktonan mas barata.
Kiko nos mes por hasi.
Na promé lugá maneho di preis ta un responsabilidat di gobièrnu di Boneiru. Pa e makuto di produktonan básiko, gobiernu mester publiká e preisnan ku a keda stipulá pa gobièrnu i tene un kòntròl estrikto riba esaki. No por pèrmití subi ningún preis di e produktonan den e makuto sin ku gobièrnu traha un dekreto riba esaki. Pues gobiernu den e asuntu di subimentu di preis di pan si e ta forma parti di e p roduktonan den e makuto mester aktua.. punto.
Nos mes komo komunidat por yuda nos mes dor di hasi gastunan mas konsiente. Nos por spar sèn dor di entre otro hasi uso di awa i koriente mas konsiente. No laga awa kore pa loko, usa koriente estriktamente nesesario, kore auto mas konsiente i spar riba gastu di gasolin i/o disel. Hasi kompra mas konsiente dor di kompará preisnan di produkto. No ta nesesario kumpra pa marka si e produkto mas barata ta mes bon.
Kiko sindikatonan por hasi
Sindikatonan por será akuerdo ku komersiantenan ku ta brinda nan miembronan deskuentonan faborabel. Den esaki e sindikato AFBW a bai dilanti. Otro sindikatonan i hasta USIBO por sigui e ehèmpel aki.
Sindikatonan por stimulá nan miembresia i yuda nan lanta koperativanan di hasi kompra huntu. Kumpra huntu ta bira interesante pa e komersiante duna rebaho pasobra e ta garantisá ku bende na un volumen mas grandi por hasi su margen di ganashi tambe mas moderá.
Kiko gobièrnu di Ulanda por hasi.
Oumento di preis ta kousa pérdida di forsa di kompra. Esei ke men ku bo por kumpra ménos produkto i/o servisio pa e mesun sèn. E situashon aki ta afektá tur hende pero mas pisá e grupo den nos komunidat ku ta gana sueldo mínimo of nèt un tiki mas haltu ku sueldo mínimo. Tambe e ta afektá e grupo kobradó di ònderstant i e grupo ku ta dependé solamente riba penshun di behes komo nan úniko entrada. Esaki ta pa motibu ku te ainda después di 11 aña no a stipulá un eksistensia mínimo.
Gobièrnu di Ulanda den esaki por dekretá un korekshon di e inflashon, Na Ulandes indexering i ta apliká esaki riba e eksistensia mínimo i e sueldo mínimo. Ku esei e gruponan mas vulnerabel den nos komunidat ta haña un kompensashon pa asina por mantené nan forsa di kompra.
Gobièrnu di Ulanda por oumentá tambe e asina yamá “belastingvrije voet”. Esaki ta e montante di entrada ku un hende tin ku paga belasten riba dje. Na mi opinión e pérdida ku gobièrnu su kaha ta sufri ku e oumento aki e ta hañé kompensá den e ABB ku nos tur ta paga riba kompra di produkto i servisio.
Gobièrnu di Ulanda por supsidiá tambe e preisnan di energía, esta di awa i koriente manera ela hasi den e temporada ku nos a keda afektá pa Covid-19. Riba plano struktural aprobá e petishon di invershon di WEB pa energía alternativa ku lo rebahá kosto di energía supstanshalmente.
Mui probablemente tin otro medidanan ku ekspertonan riba tereno di ekonomia i belasten por proponé pa kompensá e oumento di kosto di bida i kosto di hasi negoshi.
Kiko Gobièrnu di Boneiru por hasi ?
Maneho di preis ta un responsabilidat di gobièrnu di Boneiru. Ta gobièrnu di Boneiru ta stipulá tur preis di produktonan den e makutu básiko. Ningun komersiante por subi preis di e produktonan aki sin ku Gobièrnu a duna pèrmit. Ta p’esei gobiernu su departamantu di Handhaving mester kontrolá esakinan. Fundashon Tienda pa Konsumidó i Unkobon tambe tin un tarea di vigilansia pa protehá e konsumidó kontra subidanan di preis sigur pa loke ta produktonan di e makutu. Pues si pan a subi i no tin un dekreto di gobièrnu pa esaki e subida ta kontra di lei.
Gobièrnu di Boneiru por duna un kompensashon un biaha(lumsum) pa suavisá e subida di preisnan aki pa e grupo vulnerabel. Esaki ta e grupo ku ta gana sueldo mínimo of mas abou. Pa hasi esaki na mi opinión e por pidi Ulanda oumentá e vrije uitkering òf pidi un doeluitkering.
Gobièrnu di Boneiru por amplia e makutu básiko ku produktonan saludabel i hiba kòntròl estrikto riba esaki. Tambe gobièrnu por konsultá ku komersiantenan i palabra un margen di ganashi. Nos tur mester biba i no ta e intenshon pa nos bira riku di awe pa mañan i sigur no empobresiendo un parti grandi di nos komunidat.
Gobièrnu di Boneiru por invertí dirigí riba nos sektor primario i krea insentivonan fiskal pa e sektor aki, esta agrikultura, kriamentu di bestia i peskeria. Nan ta indispensabel pa produsí kuminda.
En todo kaso loke gobiernunan NO mester hasi ta sinta man krusá i laga kos bai. Pasobra e úniko konsekuensia di no aktua ta ku un gran parti di nos komunidat ta bai kai den pobresa i hasta miseria. I esaki ta kontra un di e metanan sigur ku Nashonnan Uní a pone pa alkansá pa 2030, esta kombatí i kaminda ta posibel eliminá pobresa. Pobresa kreá ta un krimen kontra humanidat. I un gobierno t’ei pa nos tur por hiba un kalidat di bida humanamente desente,
