Sindikalismo na Boneiru parti 13, 3 aprel 2023
Awor si ta basta. Hunta di komisario, akshonista Bonaire Holding Maatschappij i akshonista mayó, Bestuurscollege di Boneiru mester tuma medida inmediatamente den Selibon. Kualkier hende ku dos plaka di sintí ku ta sigui e desaroyonan rondó di Selibon ta yega na e konklushon ku e situashon na e kompania no por sigui. De fakto Selibon ta téknikamente bankarota i ademas e sindikato ku ta representá e mayoria di e trahadónan públikamente a deklará di no tin konfiansa mas den e aktual gerensia di e kompania. Ta dos faktor ku ta pone ku e kompania no por operá normal. Téknikamente bankarota ta pasobra e no tin fondo pa kumpra ekipo nobo, esta entre otro trùknan nobo pa por hiba un operashon di kue sushi normal riba e dianan i segun e skema. Aparentemente ta un trùk tin den operashon i ku esaki tambe ta den tal estado ku de fakto no ta adekuá pa trafiká riba kaya. E echo ku e trùknan aktual no ta sirbi i ku no por kumpra trùk nobo ta nifiká ku no a hiba un maneho di mantenshon preventivo adekuá, pero tampoko a hiba un maneho finansiero di tal manera ku a reservá fondonan pa na su debido tempu por a remplasá e truknan. Mui probablemente pasobra e “eigen vermogen” ta negatief ningun banko no kier kore ningun riesgo di fia Selibon un gran kantidat di plaka sin e seguridat ku nan lo por paga esaki bèk. E último aki nos por bisa ku seguridat, ya ku tin algun aña ku e kompania no ta produsí su kuenta anual na tempu i pió ainda no ta produsí un kuenta anual aprobá pa un accountant. Si nos konbiná esaki ku e estado di mantenshon ku e edifisio di Selibon ta aden, esta e garashi, e kantina na Kaya Industria i e situashon na lèntfel, no por konkluí otro ku aki ta trata di un mal maneho di años ku gerensia a hiba pero tambe ku hunta di komisario a faya di korigí na tempu neglishando nan tarea di supervishon. Interesante pa sa ta kuantu debe e kompania tin na entre otro belasten i otro kreditornan ku tambe ta hasi ku e no por hiba un operashon normal, ya ku e no por hiba mantenshon preventivo pa falta di piesanan ku mester t’ei pa remplasá esnan dañá.
E deklarashon di AFBW ku na nòmber di e trahadónan no tin konfiansa mas den e aktual gerensia ta debí na e trato ku gerensia ta duna su trahadónan, esta un trato di menasa kontinuo, intimidashon, papia malu, hinka miedu den e trahadónan i ku un falta di rèspèt i balorisashon komo hende. Mui probablemente e falta di konfiansa aki ta manifestá su mes den un porsentahe di apsenteismo haltu, un demotivashon pa bai traha, pues un bahada den e produktividat di trabou. Un gerensia ku no ta realisa ku e ambiente di trabou ta mes i/o mas importante ku e pago pa trabou, ta un gerensia ku no ta demonstrá e kapasidat di manehá un kompania di vital importansia manera Selibon. Selibon ta hopi importante pa nos salubridat públiko, pa nos medio-ambiente i komo tal pa henter nos ekonomia. E loke e trahadónan aki ta presta for di 5’or di mardugá i durante henter dia bou di e sirkumstansianan malu aki tin rèspèt i apresio di henter nos komunidat. Mirando e situashon, klaramente nos por spera un ora pa otro ku e trahadónan su kana lo yena, awa lo pasa hariña i nan lo drenta un akshon fuerte ku sosten di nan sindikato. Pa salba Selibon i bin ku un Selibon nobo ta un solushon tin, esta mester bin ku un nul-meting den e kompania pa establesé e problemanan den e kompania i pa traha un plan di reskate pa kuminsá di nobo den un forma finansieramente sano i duradero. I pa hasi esaki e aktual gerensia mester hala un banda. E eskoho pues ta bai ta ku si ta mantené e situashon aktual i Selibon ta bati bankarota i probablemente Boneiru ta bai bira un isla sushi ku un posibel akshon di e trahadónan òf ta skohe pa salba Selibon i tuma awor e medidanan apropiá. Mi tin sigur ku komunidat den su gran mayoria lo apoyá trahadónan i no e maneho aktual di gerensia.