For di investigashon a sali na kla ku hóbennan na Boneiru ta sinti falta di aktividat. No ta reta nan. Pero spesialmente ora bo ta yòn, bo mester di hopi eksperensia diferente pa siña konosé bo mes i bida. Asina despues bo por hasi mihó eskoho.
Na Boneiru no tin nada di hasi pa hóben? Awor si.
Komo kontesta riba e problema akí, ta bini un programa nobo na Boneiru: Servisio pa Komunidat Boneiru (Maatschappelijke Diensttijd Bonaire – MDT Boneiru), un kolaborashon entre Entidat Públiko Boneiru i MDT Hulanda. Hóbennan entre 13 i 27 aña por partisipá na esaki. “Komo hóben, bo ta bai hasi algu pa komunidat”, bosero Damaly Linkers ta bisa. “Pero bo ta hasi esei pa bo mes tambe.” Na tur, bo ta dediká 80 ora na esaki, repartí den seis luna. Atardi despues di skol, despues di trabou òf den fakansi bo ta bai bo proyekto na un organisashon. Organisashonnan ku ta partisipá mester por ofresé un bon lugá pa siña. Nos ke kuminsá ku 5 organisashon pa un total di minimalmente 50 hóben.
Ta guia e hóbennan personalmente den nan biahe di deskubrimentu pa e mihó vershon di nan mes.
Meta di MDT Boneiru ta ku hóbennan ta desaroyá nan talentonan, siña konosé nan mes mihó i sa mihó kiko nan ke den bida. Profeshonal ta guia nan. Hóbennan por registrá pa vários motibu. Por ehèmpel pasobra nan no sa kiko nan ke den bida, òf pasobra nan ke guia den desaroyo di nan talentonan. “Algun hóben ke atkerí mas eksperensia promé ku nan tuma desishon importante tokante nan bida. Òf pa un tempu nan ke hasi trabou signifikativo. Òf nan ke mira kua oportunidat nobo e proyekto ta trese. Pero tambe ora solamente bo ke pasa tempu plasentero i signifikativo, MDT Boneiru ta un bon idea. Registrá i e ora ei bo ta eksperensiá di mes kon dushi ta.”
MDT Boneiru: di hóben, pa hóben
MDT ta un éksito kaba na Hulanda. “Pero esei no ta nifiká ku na Boneiru nos ta bai hasi meskos. Nos ta mira bon kiko si ta funshoná i no ta funshoná pa Boneiru i pa hóbennan aki. Es mas: hóbennan mes por disidí. Pasobra ta un programa duradero pa hóben, pero tambe di hóben. P’esei MDT Boneiru tin un pènel di hóben: un grupo di hóben ku ta duna nos konseho tokante aktividatnan ku nos mester ofresé.” MDT Boneiru mester bira un programa ku ta entusiasmá hóbennan. Bo por inskribí ainda pa e pènel di hóben akí. E ora ei bo por yuda disidí tokante aktividatnan ku MDT Boneiru ta bai ofresé. “Podisé bo ke siña traha programa di televishon. E ora ei nos por puntra un kompania di televishon si nan ke partisipá. I e ora ei por ehèmpel bo por traha un programa di televishon pa hóben serka nan. Òf talbes bo ta interesá den polis òf kuerpo di bombero i bo ke eksperensiá kon ta pa traha einan. Òf bo ke siña trein kachó, òf kabai. Òf bo ke hasi algu pa bo propio bario. Resumiendo: bo tin un bon idea? Konta nos!”
E programa solamente ta bira un éksito ku proyekto i organisashon hopi diferente.
MDT Boneiru mester bira e punto kaminda organisashonnan por akudí ku nan proyekto. Mas diferente, mas mihó. Kada hóben ta diferente i asina nos ta oumentá e posiblidat ku tur hende ta haña un eksperensia ideal. Importante ta ku organisashonnan ta haña bon informashon tokante kondishonnan. Si nan ta kumpli ku e kondishonnan, nan por pidi un supsidio. Tin biaha un supsidio finansiero ta fasilitá realisashon di proyekto. Pensa aki na proyektonan riba tereno di naturalesa, animal, sostenibilidat, téknika i ICT, polítika i gobernashon, enseñansa i edukashon, medionan di komunikashon i kultura, deporte, kuido, bienestar òf seguridat. Bo ta kere ku bo organisashon ta kuadra ku MDT? Tuma kontakto ku nos!
Bo ke sa mas? Tene e página di MDT na bista https://qrco.de/MDT-Bonaire. Òf manda un meil pa mas informashon: doemee@mdt-bonaire.com.