ORANJESTAD,Aruba
E nobena Nacional na Honor di nos patrona stima Santisima Virgen Mama Maria di Alto Vista lo tuma lugar segun e normal nobo. E nobena mes cu ta cuminsa dia 28 di september proximo lo ser celebra den misanan di tur parokianan den nos pais mes, no na Kapel manera ta e costumber di tur anja. Miembronan di e Comision Nacional representando tur parokianan di nos pais ta ser pidi pa tene cuenta cu e cambio aki y pa yuda Pastoor di nan Parokia pa organisa esaki.
E fiesta Nacional dia 7 di october, si lo tuma lugar na Kapel di Alto Vista mes, pero den un forma hopi chikito, esta cu cada parokia por ta presente cu 10 parokiano di nan districto. Esaki lo ser apunta door di cada Pastoor di e parokianan. E Santo Sacficio di Misa ta cuminsa pa 5:30″or di atardi.
E Santo Sacrificio di Misa dia 7 di October lo ser dedica na oracion profundo y peticion na nos Mama Celestial stima pa intermedia pa nos pais. Cu otro palabra den un union profundo nos lo bai reza pa nos pais pa libra nos di e epedemia cu azota nos pais den un forma sin comparacion. Tambe lo reza pa esnan cu a perde nan bida door di e Virus.
Esnan cu ta interesa cu nomber di nan defunto sima, kende a fayese door di e virus ser menciona e atardi aki por manda esaki na e-mail:atanleesr@gmail.com.
Contacto a ser tuma den nomber di Vicario Andres y otro Pastoornan di nos pais pa Tele Aruba transmiti e Santo Sacrificio aki en bibo y directo pa asina henter pueblo por sigui esaki.
Ta pesey pa esnan cu ta dirigi nos pais por ta presente pa nan tambe tuma lugar na e celebracion Nacional, cu lo bira un atardi especial di oracion mas protecion y bendicion pa nos pais.
Esnan, especiamente nos grandinan cu no por asisti na e nobenanan den e parokia, por tene esaki na cas mes y sigui e celebracion dia 7 di october via Tele Aruba.
Den un union grandi, e anja aki mas cu nunca, nos lo reza pa nos pais y tambe duna nos Patrona stima un bunita homenahe ariba dia di Su celebracion.
Fielnan ta ser pidi pa dorna Kapel cu flornan ariba e dia grandi aki pa nos Religion. E ta e sitio Religioso mas bishita pa nos hendenan y nos bishitantenan.
