Entidat Públiko Boneiru a disidí pa no laga yegada di Sanikolas na Boneiru tuma lugá e aña aki. Na lugá di esei ta bini un programa alternativo digital. For di e aña aki tambe e koló pretu di ‘piet’ ta disparsé for di tur yegada ofisial di den futuro.
Debí na e reglanan aktual pa evitá plamamentu di e vírùs di corona no ta posibel pa laga e yegada tuma lugá e aña aki. Diputado Nina den Heyer a trese esaki dilanti durante un reunion ku organisadónan di e yegada anual di Sanikolas i e spònser mas grandi di e evento.
Pa hopi aña kaba tin diskushon ta tuma lugá tokante ròl di ‘Zwarte Piet’ durante fiesta di Sanikolas. Esaki tantu na Boneiru komo den Reino. Un parti di nos pueblo ta mira ròl i aparensia di e pitnan ku koló pretu komo ofensivo i rasista. Tin indikashon hopi kla tambe ku tin mucha ku ta eksperensiá e periodo aki komo no agradabel. Esaki a bini dilanti durante kòmbersashon ku figuranan klave. Kolegio Ehekutivo ta haña importante pa tene kuenta ku e opinionnan aki. Ta importante pa organisá un fiesta ku grandi i chikí ta eksperensiá komo positivo i seif. Pa e motibu aki Kolegio Ehekutivo ke pa e adaptashonnan i kambionan tuma lugá paso pa paso na Boneiru.
Entrante e aña aki koló di e pitnan ta bira otro. E pitnan ta haña diferente koló. No ta pèrmití pit ku koló pretu mas durante yegada ofisial di Sanikolas na Boneiru. Ta apliká e adaptashon aki den e programa alternativo tambe di e organisashon ‘We Do Entertainment’ ku ta organisá e yegada. Nan ta pensa un alternativa pa tòg laga nos muchanan di Boneiru gosa di fiesta di Sanikolas. Na e momentunan aki e organisashon ta preparando un programa digital pa Sanikolas. Dentro di poko ta anunsiá e programa aki
