Durante programa ‘Nos Realidad’ di Plataforma Nos Pais, Otmar Oduber a presenta un carta di DOW caminda cu un suma di casi ¼ miyon Florin lo keda gasta cada pasa un luna pa supuestamente mata e olor cu tin den e area di RWZI banda di hotelnan cu ta vies y grave pa e ser humano. Lamentablemente e no ta funciona, tur hende ta reclama pa e olor, tanto local como turista. Mientras tanto ta purba tira santo den wowo di pueblo cu un bioaugmentation cu ta costa casi ¼ miyon Florin y cu supuestamente mester tapa e olor.
Ta papia riba solucionnan, di bin cu cobransanan di $20 riba turistanan pa atende cu e situacion di RWZI y un otro $15 pa privatisa Directie Luchtvaart, pero no ta tende riba ningun rapport cu ta bay wordo traha.
Menos mal e cobransa di $35 a wordo para, y Otmar ta spera cu e wordo elimina, pasobra esaki ta significa cu pa cada turista cu drenta Aruba, prome cu nan por bebe algo ya caba nan mester paga na entrada $35 adicional pa persona, independiente di e tempo cu nan lo ta na Aruba. Esaki simplemente pasobra no tin un maneho.
“Esaki no kiermen cu ta contra privatisacion di RWZI, al contrario, nos tambe ta na fabor di dje, hasta a purba hacie y a cuminsa prepara e tempo ey, sea pa e wordo hinca den un NV nobo di gobierno, bou Utilities. Importante ta pa e privatisacion wordo haci na un manera transparente. E tempo ey a bisa cu mester inverti aproxidamente 48 miyon Florin, pero awe gobierno y minister ta papia di riba 200 miyon cu mester wordo inverti, pero ningun hende sa pakico. Ningun hende ta mira un rapport, un destaho publico. Gruponan serio a manda oferta pa gobierno, pero no a tende nada, siendo cu nan a manda oferta 8 pa 10 luna pasa, pero mientras tanto ta tende cu ya caba kier cuminsa cobra, kier pasa ley y hinke den man di Utilities”, Otmar Oduber ta cuestiona.
E planta di RWZI a wordo traha tanto aña atras pa maneha un nivel di awa hopi mas abou di loke e ta manehando awor aki. Pa duna un ehempel, si e awa mester draai 24 ora pa e nivelnan di bacteria baha pa e no ta un peliger pa e awa bay den Bubali plas (ni lama), awe e ta draai solamente 6 ora debi na e volumen di awa cu tin, kiermen cu e awa ta saliendo cu tur e desperdicio y bacterianan cu tin den dje pa e plas y despues pa lama. Efecto di esaki ta cu entre otro, tur nos coralnan den e area aki ta practicamente inexistente, segun un rapport traha na 2019 ‘Coral Reefs Baseline Study for Aruba’.
