ORANJESTAD, Aruba
“E accionnan di Augustus Scur 1977 tabata determinante pa Aruba por a logra su Status Aparte na 1986”
E luna aki, esta Augustus 2020 ta un luna historico caminda nos ta recorda cu 43 aña pasa nos pueblo a lanta para pa defende su autonomia, su libertad. E motibo tabata cu den e eleccion di Staten di dia 17 di juni 1977 partido MEP a gana den forma aplastante obteniendo 5 di e 8 asientonan. Despues di e victoria den e eleccion aki, e formador Boy Rozendal a maniobra di tal forma pa laga e partido mayoritario MEP for di gobierno, esta sin respeta e decision di e electorado Arubano.
Ola di protesta
Dia 15 di juli 1977 e sindicatonan uni di Aruba a cuminsa cu deliberacionnan riba e resultado di eleccion. E sindicatonan hunto cu comercio y clero tabata di opinion cu MEP no por ser exclui for di Gobierno Central. Telegramnan a wordo manda pa Hulanda, Nacionnan Uni y varios otro organisacion internacional. Pero no a bin ningun reaccion. Consecuentemente un ola di protesta a cuminsa den tur parti di Aruba, mirando e echo cu un partido minoritario di Aruba a drenta gobierno Antiano lagando MEP completamente afor.
“MEP ta un partido di principio y prestigio cu no ta bay mendiga pa drenta gobierno. Entrante dialuna accionnan lo cuminsa. Lo bay tin escalacion di e accionnan, cual lo por desemboca den un independencia total di Aruba”, tabata palabranan fuerte y decidido di nos Libertador Betico Croes e tempo ey.
Sindicalistanan encarcela
Riba dia 10 augustus 1977 dos sindicalista, esta Chinto Geerman (dfm) y Juan Yarzagaray a ser encarcela pa motibo di un pamfleta cu nan a emiti dia 9 di augustus 1977. Den un reunion urgente cu a ser teni e anochi ey na Centro di Bario Noord, a dicidi cu lo bay Warda di Polis na Playa pa exigi libertad di e dos sindicalistanan aki. Hendenan tabata furioso y tabata tira piedra riba e polisnan. Despues a bay protesta dilanti cas di Officier van Justitie Arps. Durante e anochi ey a sigui reunionnan entre Betico Croes, e lidernan sindical y Officier Arps na Bestuurskantoor. Pero esey no a duna ningun resultado.
Aruba den scuridad total
Su dia siguiente 11 di augustus 1977, e sindicatonan den gran mayoria a proclama un welga general caminda a pone trabao abao, a subi caya y unda e sindicato di WEB tambe a notifica gobierno cu lo bay kita coriente y consecuentemente esey a trece problema pa suministro di awa. E welga general a isola nos isla, ya cu e comunicacion via telex a paralisa y e avionnan di ALM tampoco por a baha na Aruba. Henter nos comunidad a keda den scuridad total. Mas laat den anochi a baha un avion yena cu Riot Comando for di Corsou bao guia di Castillejo Cova cu a bin marcha den cayanan di Oranjestad. E tension a sigui crece y pa dianan largo Aruba tabata paralisa.
Durante e protestanan dilanti Bestuurskantoor balanan cayente a cay, a tira riba e jeep di Betico Croes y tambe varios persona a wordo herida. Den tur e acontecimentonan aki e mayornan di Betico Croes a ser humilia, su primo y diferente otro personanan a ser herida y diferente lider di bario a ser persigui.
Delegacion pa Hulanda
Sinembargo e gran mayoria di pueblo no a sucumbi pa tur e intimidacionnan aki y den forma decidido a sigui lucha pa dianan largo. Locual cu a sigui despues di tur e accionnan aki ta cu sindicatonan hunto cu politiconan a dicidi cu a base di articulo 26 di Eilandenregeling lo bay manda un delegacion pa Hulanda. Dia 19 di augustus 1977 Gobierno a ricibi un telegram for di Prome Ministro Hulandes Joop den Uyl confirmando e hecho cu Gobierno Hulandes oficialmente lo ricibi un delegacion Arubano.
E delegacion encabesa pa Betico Croes a viaha riba e dianan 3 y 4 di september 1977. Na Hulanda e miembronan di e delegacion a delibera tocante e futuro estatal di Aruba cu representantenan di Gobierno Hulandes, partidonan politico, sindicatonan y organisacionnan di dunador di trabao.
Echo ta cu tabata danki na e accionnan di Augustus Scur awe Aruba ta gosa di su Status Aparte, esta un pais autonomo den Reino Hulandes, cu su propio Gobierno, propio Parlamento, propio Gobernador, propio moneda Arubano etc.
Ta p’esey, laga e dianan aki ta dianan di reflexion pa un y tur den e pais aki realisa cu nos libertad, nos Status Aparte no a cay for di cielo, pero cu esaki a ser logra a base di sanger, sodor y lagrima y bao di liderazgo di e lider indiscutibel di e pueblo aki, esta Betico Croes.