ORANJESTAD,Aruba
Robert Candelaria miembro di fraccion di AVP ta mustra cu den conferencia di prensa riba Covid-19, den un di e poco biaha cu Prome Minister a papia di onderwijs, el a sigura cu ningun mucha mag wordo perhudica e aña escolar aki pa motibo di Covid-19.
Premier Wever Croes a bisa cu awor ora cu e muchanan ta bay scol bek, lo bin un temporada di ‘remediering,’ na unda na final e muchanan lo pasa pa e siguiente klas.
Dus tur hende a compronde cu Premier a bisa cu nan no ta keda sinta y nan ta pasa pa e siguiente klas.
Segun sr Candelaria, lamentablemente ta mira cu esaki ta wordo poni un banda den practica awor, pues palabra di Prome Minister como ‘opperbevelhebber’ no tin balor den esaki.
“Loke nos ta mira den practica awor ta cu no tin uniformidad di maneho, pasobra tur scol bou di tur schoolbestuur ta tumando decision descontrola. Tur schoolbestuur ta haciendo tur cos diferente di otro.
Esey no ta tur. Cada scol bou cada schoolbestuur tambe ta haci tur cos diferente atrobe. Algo cu sigur ta perhudica e muchanan pasobra si bo tin suerte bo ta cay bou un scol cu si ta para pabo y ta compronde cu e mucha no mag wordo perhudica.
Pero por ta e mucha ta cay bou un scol cu no ta preocupa su mes hopi y ta laga e mucha ripiti e aña tog, contrario na declaracion di Prome Minisgter.
Nos ta lamenta cu apesar cu awor no tin uniformidad di maneho den enseñansa, nos ta tende Minister di Enseñansa ta papia di derecho di mucha, Unesco y di “no child left behind” den Parlamento y den rapportnan cu a wordo presenta.
Den e caso aki e mucha no ta djis keda “left behind” so, pero nan a kita su oportunidad pa progresa y haña un chens husto pa adenlanta su mes.
Niun hende no por compronde di con te ainda no tin comunicacion den enseñansa, despues cu Minister a priminti esaki den Parlamento.
Ta laga maestronan prepara pa reaptertura di scol den un forma y un siman despues ta bisa nan algo totalmente diferente. Tur nan preparacion tabata por nada y pa e motibo ey tin frustracion grandi entre maestronan.
Dicon e Minister no ta cominica y dialoga cu e field, prome cu e tuma desicionnan importante asina?
Dicon ta comunica cu maestronan via rueda di prensa y no via e canalnan corecto di nan schoolbestuur?
Bo no por papia di “no child left behind”, Unesco y derecho di mucha, siendo cu hopi mucha awor ta bay wordo “left behind” y den realidad no ta sali dilanti pa defende e derecho di e muchanan.
Ta importante pa pueblo sa cu cada mucha cu keda sinta, ta costa pais Aruba alrededor di Afl 12,000.00 pa aña. Mas mucha keda sinta, mas gasto Aruba tin.
Dicon nos no por yuda nos muchanan y laga nan pasa over e aña aki? Mi no ta bisa pa tur aña laga tur mucha bay over, pero e aña escolar aki no ta un aña normal.
Ban haci esfuerso y yuda e muchanan y si nos ta yuda e muchanan, gobierno no ta bay desperdicia placa cu nos no tin, innesesariamente.
Nos no tin e luho di traumatisa nos muchanan mas ainda y na mes momento disperdicia placa di pais awor.
Nos ta bisa cu hopi mucha ta “left behind” e aña aki, y nos kier sa si minister a investiga cuanto mucha ta para pa keda sinta bou Skoa y Smoa e aña aki? Nos kier sa si minister ta haña esaki husto?
Esey ta just 2 schoolbestuur, pero tin mas. Nos ta puntra esaki, pasobra nos informacion ta cu entre otro e 2 schoolbesturen aki no lo aplica e regla pa no perhudica e muchanan y ta bay laga nan keda sinta normal e aña aki,” Parlamentario Robert Candelaria a declara.
![No Tin Comunicacion Ni Claridad Prome Minister Ta Sigura Cu No Pero Tog Tin Muchanan Ta Keda Sinta Parlamentario Robert Candelaria 155 Fb Img 1591314277513 2](https://www.eanews.com/wp-content/uploads/2020/06/FB_IMG_1591314277513-2-800x450.jpg)