Parlamentario independiente Ryçond Santos do Nascimento ta expresa cu loke cu por mira den parlamento ta un lastima. Den parlamento lo mester tin un oposicion cu ta fuerte y serio , pero enbes di bin cu seriedad ta bin cu secuestro psicologico di e ciudadano.
Segun parlamentario independiente Ryçond Santos do Nascimento e filosofia ta, cu ta bin cu yen di pelicula di teror den parlamento unda cu ta hunga cu emocion y ta expresa cu gobierno ta masacra pueblo.Tipo di palabranan asina manera ta papia di bysite, yun di puntonan ey ta valido pero pa por desvia for di e realidad cu nos como Pais mester tin un administracion financiero serio ta di lamenta.
Segun parlamentario Ryçond Santos do Nascimento si e pueblo ta bay tras di AVP mester wak bon kico ta e mensahe cu nan a trece den parlamento, pa pueblo no worry cu un bon administracion financiero pero sigui traha debe bay.
Enbes di bisa cu loke cu gobierno ta proponiendo pa cu e presupuesto supletorio ta bon, e mensahe di AVP tabata cu mester por bin hopi mas placa, pero enrealidad ken ta paga esaki di loke fraccion di AVP ta exigi, nos como ciudadano y e ta sali for di bo cartera.
Loke cu nos tur mester sa cu gobierno no tin ningun placa di su mes, e placa cu ta sali di gobierno ta Sali for di invoerechten y for di impuesto di Aruba. Sinembargo AVP no por ta serio unda cu ta hiba un betoog unda cu ta bisa e pueblo no worry cu disciplina fiscal, no worry cu un bon administracion financiero, pero sigui hunga cu sentimento di hende y sigui hunga santa claus ta loke cu AVP a expresa den tratamento di presupuesto supletorio di Aruba.
Sinembargo di otro banda parlamentario Ryçond Santos do Nascimento ta duna di conoce cu parlamentario Miguel Mansur ta anuncia cu lo e vota contra debi cu no tin jaarrekening. E mustra aki di parlamentario Mansur tampoco no ta mustra e seriedad di parlamentario.
No ta un secreto dicon Aruba no tin un jaarrekening , parlamento completo a haya informacion y sa cu bou di pension di Hulanda tin un trayecto unda cu ta canando e caminda pa pone e jaarrekeing di Aruba na ordo. Esaki ta tuma su tempo y pa kico e ta tuma tanto tempo paso gobernantenan den pasado a neglisha administracion financiero di Aruba for di 1986. Parlamentario Miguel Mansur no ta serio cu su ponencianan di vota contra di presupuesto supletorio sabiendo dicon Aruba no tin un jaarrekening ainda.
Di otro banda Parlamentario Ryçond Santos do Nascimento ta indica na momento cu mester mira e posicion di Parlamentario Gerlien Croes e kier hunga e banda di AVP y e banda di Accion 21 y esey ta un desaster total. Parlamentario Gerlien Croes a indica cu gobierno di Aruba a haya 600 miyon na impuesto y segun Parlamentario Croes esey ta masacra e pueblo, pero den mes un rosea ta indica bo no por paga e indexering cu gobierno ta bin cu ne, tur esaki ta un politica hunga bou di emocion pa asina por secuestra e mente di e ciudadano pa no para y pensa.
Parlamentario Ryçond Santos do Nascimento ta kere cu pueblo di Aruba mester compronde cu Aruba tin un presupuesto 2024 cu ta esun general , pero awo tin un presupuesto supletorio tambe.
Sinembargo e presupuesto mes 2024 ta un presupuesto cu e keda entrega na tempo un parti cu nunca Aruba no tabata cumpli cu ne , te na e momentonan aki bou di gobernacion di gabinete Wever Croes a cumpli cu ne dos biaha consecutivo, por mira dos biaha un surplus unda cu ta demostrando cu Aruba tin un cambio cu ta fragil y mester sigui den e direccion cu e ta canando, pero importante ta cu Aruba ta den e bon caminda.
Parlamentario independiente Ryçond Santos do Nascimento ta kere si algo ta bon pa bo Pais bo mester stimule y si e ta malo bisa cu e ta malo, pero den e caso aki e ta un stap positivo pa Aruba di tin un finansas publico corecto. Critica pa un gobierno mester keda den un contenido real y no fomenta.
