E noticia cu ta circula riba medionan social cu awa ta saliendo for di e canal for di Bubali Plas y ta haci e lama bruin y cu ta haci e lama toxico no ta cuadra cu realidad.
Awe 22 november 2024 alrededor di 1’or di merdia a cuminsa yobe na un manera intensivo. A ricibi informacion for di CMO cu a yobe entre 25-38mm di awa den 45 minuut. Esaki ta uno sumamente hopi fuerte y fuera di lo normal.
Ora cu tin yobida asina hopi y intensivo, e rooinan ta cuminsa core pa hiba awa lama y ta drenta lama na e uitmondingnan (boca) cu tin na Arashi, Ritz Carlton, Eagle Beach, Bubali, Tamarijn, Waf, Sun Plaza y otro luganan. Esaki ta un proceso normal di naturalesa. Awe nos ta wak e como un molester y ta mustra mahos , pero nos no mester lubida cu ta nos a bin invadi naturalesa su luga cu tur e edificionan rond.
Ora e rooinan cuminsa core e ta colecta tur sedimento (lodo) riba tera y awa ta haya e color bruin. Na momento cu e awa drenta lama esaki ta causa cu awa di lama localmente ta bira bruin y despues di algun dia e awa di lama ta claria y bira normal bek. E evento nan aki ora di yobida na e uitmondingnan ta un proceso natural cu ta tuma luga pa añas caba.
E yobida grandi durante e dia di awe a causa inundacion nan den area di Noord y Tanki Leendert, Tanki Flip, Pos Abao, Palm Beach, San Miguel y vecindario. E infrastructura di drenahe manera ta organisa a cuminsa transporta e awa pa e area di Eagle, Bubali y saliña dilanti di Ritz Carlton. Via di e saliña di Bubali Plas ta bay over na e sluis pa asina e awa di yobida yega su destino cu ta lama.
Ta subraya cu e awa cu ta bayendo lama ta awa di yobida den exceso cu no por wordo contene den Bubali Plas y no ta awa cu ta bin di riolering manera ta wordo insinua den medionan social. E awa aki un combinacion di awa di yobida y awa procesa.
