Pa algun aña caba, centro di Oranjestad pa loke ta principalmente Caya Betico Croes, ta punto di discusion tanto comercial como politico, ya cu principalmente despues di e pandemia di covid, e sector comercial pa gran parti a bandona centro di ciudad y e cantidad di hendenan cu ta bay cana pa haci compra den e caya aki, ta masha limita.
Comerciantenan a cuminsa mira den direccion di gobierno, sperando cu gobierno so mester bin cu solucion mientras cu e negoshinan den centro di Oranjestad, no ta duna indicacion di kier tuma iniciativa pa tin cu impulso pa nan atrae clientenan.
Aruba tin un caya bunita y atractivo caminda tin basta negoshi estableci den centro di ciudad pero na mes momento tin hopi di nan ta keha cu nan no ta haya cliente, loke ta rekeri e ora un otro tipo di “approach.”
Den ultimo lunanan, atrobe gobierno, ta papia di inverti den centro di ciudad, loke no ta nifica solamente pa e comerciante cumpra su producto, habri un negoshi por ehempel den un centro di ciudad pero tin cu convence pueblo unda cu tin un variedad di establecimento cu por sirbi necesidad di henter pueblo.
Algo di vital importancia awendia den loke ta e sector comercial, ta cu publicidad, esta propaganda di negoshinan, ta di vital importancia pa e negoshi pa motibo cu e ta yuda posiciona e establecimentonan den un posicion caminda nan ta trece mas cliente, ya cu dor di e publicidad, pueblo ta cera conoci cu e beneficio di e producto- of servicionan cu e comerciante ta brindando na pueblo.
Na momento c’un comerciante tin e miho producto of servicio pero ningun hende conoce of a tende di dje, ta mescos manera cu no tin benta y sin benta bo negoshi ta morto y tin varios ehempel di negoshinan cu asina cu nan a inverti den promocion di nan establecimento y productonan, a conoce un adelante hopi impresionante.
Gobierno a reuni cu comerciantenan, gobierno a duna informacion riba kico a reuni y na kico a yega di acuerdo pero un biaha mas por mira cu e iniciativa ta Sali for di gobierno, ta gobierno ta papia di inversion pero esey lo no ta suficiente si comerciantenan sigui mustra un pasividad cu no a cuadra cu loke nan ta aspirando, esta di mira mas cumprado den nan tienda.
Ta di spera cu e mentalidad y actitud aki cambia den 2023 y comerciantenan den caya grandi realisa cu nan envolvimento den henter e proceso pa drecha centro di ciudad, ta depende pa gran parti riba nan propio actitud y iniciativa.
No por confia ciegamente riba gobierno comerciantenan mester inverti den promocion pa haya cliente
