Awor dilanti eleccion un cantidad di posibel proyectonan ta wordo presenta na ultimo momento, door di e gabinete demisionario Wever-Croes. Esaki ta bay compaña pa acusacionnan fuerte contra un miembro di e coalicion, y detencionnan repentino den e caso contra un miembro di Parlamento actual. “What’s new”? Atrobe nada! Pa decadanan pueblo a wordo yená cu promesanan falso y di otro banda yen di atakenan feroz y personal contra opositornan politico. “Campañá ta un y goberná ta otro” toch?
Pregunta principal pa e siguiente eleccion ta, si lo sigui e votador mester sigui tolera y hasta apoya e forma di proceder di e partidonan tradicional aki, cu a percura pa e abismo financiero, economico y social cu nos pais ta aden? Ta tuma distancia y reflexion pa kende of con lo vota, mirando e punto cu nos a yega e ultimo 12 añanan? Sin lubida, pakico y kende confia den ehecucion di un programa di gobernacion, basa riba e realidad existente, pa di berdad saca nos pais y pueblo dilanti? Poco poco ta resalta cu confianza y integridad, cerca e partidonan cu a maneho nos pais e ultimo 12 añanan no tey mas. Dicon esaki?
Pa cuminsa, Aruba a wordo goberna door di un gobierno di signatura berde pa 8 aña. Den su defensa e ta bisa: “pueblo por wak unda su placa a bay”. Realidad ta, pueblo por a wak un debe astronomico cu, segun CAft, cu cada baby cu nace awor lo tin un debe di 40 mil florin riba su cabes. Tambe por wak un projecto di hospital, cu lo costa mas di 1 biyon florin. Un proyecto cu no tin fin di caba, un exceso enorme di “meerwerk” pa edificionan cu no ta cuadra cu loke a wordo priminti.
Di un banda tin gastonan enorme pa construccion, mientras poco a sosode pa mehora e calidad di e cuido medico mes. Anto awo pueblo mester bay contribui extra pa por keda haya acceso na e cuido medico.
Un otro ehempel ta e Watty Vos boulevard. Ainda tin trabou ta tuma lugar, sin control di e.o. DOW. Mientras cu tambe casonan hudicial contra un ex-minister y investigacion contra otro miembro di e gabinete anterior pa motibo di corrupcion.
Intrigantenan di e gobierno anterior, apesar cu nan tampoco por a cumpli, ta acusa e gobierno actual di a priminti, pero nunca a cumpli. UPP ta comparti e acusacion. Den 4 aña di e gobernacion actual masha poco a sosode pa alivia y duna un empuhe na un economia stanca. Ta obvio cu lo bay culpa e pandemia, pero prome cu e pandemia caba un “aanwijzing” tabata colga riba cabes di sra. Wever-Croes su cabes pa incumplimento y usa e mesun tactica di e gobierno anterior cu a presenta presupuestiona ficticio cu entradanan incidental.
Awor na porta di eleccion diripente ta presenta diferente posibel proyectonan cu tin como obhetivo yena wowo di e electorado. No ta adresa e problema real cu ta falta di un vision y tampoco kier papia di entrega di nos autonomia na unda un instancia na Den Haag lo bay maneha nos gobierno y ta pone gobierno y Parlamento elegi door di pueblo bou curatela. Mientrastanto ta keda devalua e poder di e instituto mas halto di nos Estado di Derecho. Parlamento no solamente no ta ehecuta control debido di gobierno, pero ta deha di actua contra su mesun miembronan pa falta di curashi y pa falta di reglanan cu lo por duna Parlamento e autorisacion pa atende cu parlamentarionan cu sea ta wordo sospecha di a comete actonan contra ley of cu ta wordo investiga.
UPP a tuma nota di declaracion di un Parlamentario di e partido berde cu a expresa cu pueblo no por vota pa partidonan cu no tin experencia den maneho di nos pais. Historia enberdad ta mustra cu e partidonan cu NO a participa na e ultimo gobiernonan no tin experencia den corupcion y den entrega di nos autonomia pa motibo di mal gobernacion, manera e gobiernonan di signatura berde y geel.
Pueblo no por acepta cu ta purba di tapa solo cu un dede mas. E realidad ta cu e gobiernonan di asignatura berde y geel a mustra di no por maneha nos pais SIN corupcion y abuso di poder.
Partidonan aki NO ta capas pa manouvra nos pueblo door di e awanan bruto y hiba nos na un futuro stabil.
Ta pesey e REBOOT ARUBA 2.0 lo percura door di mara mannan di e politiconan pa un MANECE NOBO PA ARUBA!