MFK ta desaprobá aktonan di agreshon kontra religiosonan ku ta Bosiferá Trabou di Dios!
Dia 3 di desèmber, nos a drenta e temporada di Atvènt. Ta tristu tende, sigun e notisia, ku pastor Baak a wòrdu agredí den un lokalidat públiko. Pastor Baak aktualmente na ubika na Parokia di San Pedro Wèspùnt. Un pastor ku pa un temporada largu tabata pastor di e Parokia Maria Auxilliadora den bario di Santa Maria, ku a batisá, risibí, konfirmá, kasa, entiero i otro selebrashonnan di misa pa nos pais.
E suseso aki a laga mi para ketu un ratu riba e profeshon di religiosonan Katóliko ku ta birando ménos rònt mundu. Ta di lamentá, ku un lider religioso ta ser agredí na momentu ku e ta hasiendo su trabou.
Apesar ku e agresor a mustra di ta arepentí ku e delitu ku el a kometé, pero responsabilidat di pais ta, pa protehá komunidat di tur tipo di komportashon inhustu i intolerabel den nos komunidat. Gobièrnu mester enfoká riba e seriedat di e suseso aki, ku a laga un sentimentunan lamentabel. Mester pone mas atenshon i dedikashon na promové igualdat humano p’asina kombatí aktonan, di diskriminashon i di intoleransia kontra religiosonan. Tambe aktonan di delinkuensia ta inaseptabel den nos komunidat, maske ku hopi biaha e akshon ta mara na faktornan di instabilidat laboral i sosial ekonómiko, òf kualke diferente faktor, pero tòg ta un akto inhustifikabel.
Sigun medionan di komunikashon ku e religioso den un forma usual den su profeshon a rekordá e agresor e mandamentunan di Dios.
Mi kier buta énfasis riba e trabou di e religioso pa su profeshon, ku ta di kòrda nos riba e 10 mandamentunan, ku nos konosé komo Kristian.
Nos komo komunidat no mester lubidá, ku e religioso su trabou ta di kòrda nos kada unu riba e mandamentunan, spesialmente e dos nan ku ta mas esensial ku ta, stima Dios i bo próhimo. P’esei nos ta lamentá e agreshon ku Pastor Baak a risibí di su próhimo.
Komo pais nos mester rechasá tur lokual ku por silensiá palabra di Dios.
Komo frakshon di MFK, nos tin e pensamentu di bini ku un moshon pa protehá libertat di e religioso di por bosiferá sin miedu e trabou di Dios. Palabra di Dios ta e arma di tur religioso. E ta e derecho di Dios. Mester protehá e trabou.
No por silensiá palabra di Dios, pero si mester por protehé.
Frakshon di MFK; Movementu Futuro Kòrsou pronto rekuperashon i sigui resa pa nos Pais.
