Miembro di parlamento pa frakshon di MFK David Seferina a tuma nota di e abusu ku ta tumando lugá ku e trahadónan di e entidatnan semi-/gubernamental i ta lamentá ku gerensia di e entidatnan semi-/gubernamental no a kumpli ku e palabrashon ku gobièrnu enkuanto pago di San Antoni.
Ta un bèrgwensa di konstatá ku gerensia di e entidatnan semi-/gubernamental ta risibí un suma supstansial den su man pe kumpli ku e klase trahadó ku ta vulnerabel den e kaso aki, ta keda sin hasi esaki i laga e trahadó i gobièrnu na kaya pa un kaso ku nos por titulá suavemente bisa un sinbèrgwenseria.
Lamentabel ta ku e trahadó ta esun ku a keda perhudiká pasobra e la stèns ku e lo risibí su San Antoni pa e por kumpli ku su debernan di kas ku e tin i tambe esnan di skol pa su muchanan.
Mi ta spera ku e intervenshon ku mi persona a hasi den e kaso aki komo representante di pueblo ku a sali na vanguardia di e trahadónan, mester ta un señal i atvertensia serio ku sènnan di pueblo ku ta destiná pa e pueblo mester keda uza pa e pueblo.
Mi ta bisa for di awor akí ku mi no ta tolerá tipo di aktonan asin’aki den ningun forma i si mi mester tin ku bai hisa esaki na un nivel mas haltu pa pone ku e trahadónan keda rekompensa konforme pagonan destiná na nan, lo mi hasi esaki sin basilá ni un momentu pa esaki sosodé.
Mi ta spera ku e kaso aki no mester yega asina leu i mi ta urgi gerensia di e entidatnan semi-/gubernamentalnan komo representante di pueblo di Kòrsou pa kumpli ku nan deber síviko pa e trahadónan al final risibí nan San Antoni paso abusu si mi no ta tolerá.
