Entidat Públiko Bonaire (EPB) aña pasá a tuma desishon ku no ta bai pone kama i stul di riba playa mas na Bachelor’s Beach (Playa Fòrn’i Kalki). A adaptá e plan di renovashon na diverso punto, di manera ku e ta kuadra mas ku e deseonan di e pueblo di Boneiru.
Esaki ta nifiká ku e imágen ku aktualmente tin proyektá riba e bòrchi di promoshon na e playa no ta kompletamente korekto.
Un revishon di e plan di desaroyo ta resultado di feedback for di habitantenan di Boneiru i un petishon entregá. Riba e promé presentashon di e plan Bachelor’s Beach renová na 2021 kaba, a drenta hopi feedback pa realisá e proyekto na otro forma. Komo reakshon riba esaki Diputado Thielman a drenta den konsulta ku e hendenan pa skucha nan preokupashon i pa buska solushonnan konhuntamente. Seguidamente EPB a bai bèk mesa di diseño pa hasi adaptashonnan tokante e renovashon di Bachelor’s Beach. Pues for di aña pasá EPB a tuma desishon ku lo no ta bini mas ku kama i stul di riba playa i ku ta renová e trapi eksistente kompletamente, di manera ku tur hende por baha drenta laman na manera safe. Ademas no ta bai krea mas lugá di parkeo (di piedra) i ta bini un solo kiosko, na lugá di tres manera a menshoná anteriormente. E kiosko ta krea oportunidat pa un komersiante lokal por kuminsá ku un negoshi na un sitio bunita i krea entrada. Konstrukshon di un tualèt públiko ta sigui.
Desaroyo di e playa ta pa mehorá e fasilidatnan di manera ku famianan por disfrutá mas di e sitio akí, ku mantenshon di e ambiente natural aktual. Ku e revishon di e plannan EPB ta boga na realisá un sitio kaminda tantu habitante komo bishitante di Boneiru ta hasi uso di e fasilidatnan ku e playa ta brinda.