ORANJESTAD,Aruba
Niurick Osdrick Hereira diabierna a wordo haya culpabel di diferente acusacion pa cual el a wordo manda KIA pa algun aña.
E caso di Niurick a wordo trata algun siman atras, riba e mesun dia cu su ruman Erick Schneiders a keda condena pa maltrato di un preso den KIA. Erick ta sintando un castigo di 14 aña pa asesinato.
Niurick tabata envolvi den un caso na October aña pasa unda cu el a los tiro, pero tambe e tabatin acusacion di posesion di arma di candela y balanan cayente.
Polisnan a tene un razzia aña pasa na un cas unda e acusado tabata of ta biba y a haya diferente arma di candela, bala y jacket anti-bala pero di esnan cu Polis ta uza. Pero e acusacion mas serio ta esun cu el a los tiro mes contra e ex amigo di su amiga. Aunke cu e acusado a papia di defensa propio, esaki ta un storia cu Hues no a cay p’e.
E problema a cuminsa ora cu nan tabata na un club nocturno. E acusado tabata den auto cu su amiga, ora cu e ex di e amiga a dal den porta di nan auto un scop. Despues cu nan a bay for di e sitio, e homber di inicial L. a sigui nan tras. E persecucion a causa cu e auto den cual nan tabata a accidenta. Durante tratamento di e caso, e acusado a splica Hues, despues cu e no kier a papia, cu despues di e accidente el a baha for di e vehiculo. Aki ta caminda cu L., kende e conoce bon, a trata di dal’e cu auto. Pa e motibo aki el a saca e arma y a los algun bala di cual uno a dal den e windshield. Pero e declaracion di L. ta contradeci esun di Niurick. E tabata core tras di e acusado ora cu dado momento el a mira flash di candela y zonido di tiro biniendo for di e auto su dilanti. Esaki a pone spanta y el a dal tras di e auto. Y ora cu el a bay pasa e auto, a mira e acusado baha e bentana y dirigi un arma riba dje. E motibo ey el a cera e auto pa haya chens di huy for di Niurick.
A base di esaki y investigacion tecnico, a rechasa e ponencia di e acusado, cu el a actua den defensa propio. Riba e auto di e victima tabatin cuatro impacto di bala.
Pues a hay’e culpabel di intento di asesinato, posesion di arma di candela, di bala y jacketnan anti-bala di Polis.
Asina el a keda condena na 6 aña di prizon, manera cu Fiscal a pidi tres siman pasa.
