Ningun mucha muhé no tin ku falta skòl pa motibu di falta di esaki

Ta importante pa produktonan di uso durante di periodo di menstruashon ta aksesibel pa tur hende muhe

Ala Femenino di Partido MAN ta sumamente satisfecho i orguyoso di e èksito di e di dos edishon di “Menstruashon Solidario” ku a keda organisá resientemente. 

Ala Femenino di Partido MAN dia 28 April ùltimo a “kick off” i kolektá “maandverband” riba Dia Internashonal di Higiena Menstrual i alabes papia riba e tabú di pobresa menstrual ku ta nifiká falta di akseso na produktonan di uso pèrsonal pa e periodo di menstruashon, manera p.e. “maandverband”/kotèks. 
Pero tambe konsientisa riba higiena durante di e periodo di mentruashon di hende muhé / mucha muhé.
E pobresa menstrual a bira aun mas grandi mirando e grado di pobresa ku a aumenta den nos pais resientemente.

Na Kòrsou tin hopi hende muhé /mucha muhé ta pasa den situashon fèrfelu òf nan ta pèrdè dia di trabou òf di skol pa motibu ku no tin sèn pa kumpra produktonan di uso pèrsonal pa su menstruashon.
Hopi biaha menstruashon ta presentá ora nan ta na trabou, skòl òf un luga públiko i nan no tin e produktonan ku nan tin mester di dje pa motibu finansiero / sosial no opstante e produkto aki ta den makuto basíko. 
Den kuadro di empoderamentu di nos hende muhénan, Ala Femenino di Partido MAN a organisá dos djasabra di “drive thru” ku a karga e number 
” Menstruashon Solidario” .

Tur loke a keda kolektá, a keda paketá i repartí na entre otro prizon (SDKK) i instansianan di hoben manera GOG, Casa Manita, i Huize Sr.Jozef pero tambe na Voedselbank.
Diferente miembronan di Ala Femenino tabata enkargá ku repartishon di paketenan di “maandverband” den luna di mei i juni na no menos ku 46 skol básiko, avansá aki na Kòrsou , SBO, HBO/Universidat.

Ala Femenino di Partido MAN ta gradisí pueblo di Kòrsou ku a duna oido na e proyekto kaminda pueblo di Kòrsou a koperá en grande pa aportá pa e produktonan di menstruashon ta aksesibel. Tambe ta sostené Unidat di Bario ku riba nivel di bario ta kontinua pa soru pa aksesibilidat di produktonan di menstruashon pa esunan den nesesitá i asina huntu ku mesun meta soru pa akseso di e produktonan aki.

Di e manera aki Ala Femenino di Partido MAN a kontribuí na e konsientisashon ku menstruashon no mag di kondusí na faltamentu di dia di skòl , miedu, eksklushon òf bèrguensa, pa motibu ku biba ku diginidat durante menstruashon tambe ta un derecho humano.