Reunionnan di IPKO a cuminsa y tin diferente werkbezoeken na Amsterdam cu e delegacion ta bay mira den practica cierto formanan cu Hulanda ta brinda cuido “Mental Health “ pa asina e delegacion tin un bista con e ta keda organisa y con Hulanda ta atende cu e parti aki, pero tambe lo haci bishita pa mira con Hulanda ta atende cu pobresa.
Gobierno di Aruba a contribui na un pobresa enorme na Pais Aruba y historicamente porehempel Pais Curaçao tambe ta sufri di pobresa y te ainda no por a Sali di esaki, pesey mes pa e islanan den Caribe ta importante pa mira con Hulanda ta atende cu e parti aki pa asina por haci miho na Aruba, asina parlamentario Arthur Dowers a indica.
Na momento cu ta papia di pobresa tambe a vocifera e pobresa cu a keda crea door di gabinete Wever Croes. Si mira e desaroyonan cu ta pasando na Aruba parlamentario Arthur Dowers un biaha mas ta vocifera cu semper a bisa cu Glenbert Croes nunca no mester a bira minister mirando cu semper tabatin un comportacion dudoso. Si mester analisa den pasado caba na momento cu Glenbert Croes a bira minister unda e screening a pasa pero te dia di awe no por a compronde con esaki por ta posibel.
Esaki a keda cuestiona den parlamento tambe con por a logra di haya un screening positivo. Despues cu a bira minister por a tuma nota cu a ricibi carteranan cu no ta compatibel debi cu no por duna e mes un mandatario cu ta deal cu maneho di labor e mes un maneho di DIMAS, esaki ta pone cu henter e sistema Checks and balances no lo funciona. Tambe e movecionnan cu e mandatario a haci unda cu a hala e director di DIMAS y e mes ta firma y tuma su decisionnan unda cu ta bira heer en meester riba e tereno unda cu a dicidi cu tur permiso ta wordo firma door di su mes un persona no ta bon pa Pais Aruba.
Parlamentario Arhur Dowers ta duna di conoce cu e no ta kere cu ningun di e movecionnan cu Minister Glenbert Croes a haci ta pa regla algo den bienestar di Pais Aruba, pero loke cu e wordo haci ta pa e tin un control total y por haci y deshaci di locual ta bon y por duna ken cu e kier permiso pa por legalisa ilegalnan cu ta un desaster completo pa Pais Aruba.
