Aworaki ta mas di un aña kaba cu Aruba a conoce su dos prome casonan positivo di Covid-19. Foi diabierna 13 di maart 2020 Aruba a conoce diferente reto, desaroyo negativo y problema. Economia, enseñansa, esfera social-emocional, husticia y den particular salud ta desde aña pasa bao di un preshon.
Pa medio di contacto telefonico, email y chat, pero tambe sigur pa medio di e workshop ‘E normal nobo’ den scolnan, Fundacion Telefon pa Hubentud Aruba por a constata cu nos muchanan y hobenan na Aruba tin retonan emocional y door di esaki ta bao preshon mental. Esaki a hasi cu a wordo traha e documento ‘Bao Preshon’ di Fundacion Telefon pa Hubentud Aruba. Ja prome cu e Pandemia di Covid-19 caba, pero sigur cu yegada di Covid-19 aki na Aruba, por papia di un cifra cuantioso di mucha y hoben cu problema di salud mental. Organisacionan internacional ta mustra ariba e echo cu e salud mental di mucha y hoben den e añanan benidero por bai bira un problema mas grandi.
Mirando cu Fundacion Telefon pa Hubentud Aruba pa medio di su servicio na nos muchanan y hobenan a constata cu salud mental di nos muchanan y hobenan ta bao preshon y pa por sigui prepara e mentor na Fundacion Telefon pa Hubentud Aruba pa e por duna e mihor servicio na nos muchanan y hobenan di Aruba, a organisa ‘Deskundigheidsbevordering Dag’ 2021. ‘Deskundigheidsbevordering Dag’ e aña aki a hiba e titulo “Ningun Grito den Silencio”.
Ningun Grito den Silencio ta tipifica e pasion y amor di Fundacion Telefon pa Hubentud Aruba pa yuda tur mucha y hoben cu tin mester di ayudo.
Durante ‘Deskundigheidsbevordering Dag’ Ningun Grito den Silencio e conocemento y habilidad di e mentornan cu ta esnan cu ta scucha, sostene y guia e muchan y hobenan a ser ahusta. E profesionalnan cu a presenta durante ‘Deskundigheidsbevordering Dag’ Ningun Grito den Silencio y a capacita e mentornan di Fundacion Telefon pa Hubentud Aruba tawata sr. dr. Van Gaalen di Respaldo, sra. Janine Rodriquez, BSW di Bureau Slachtofferhulp KPA y sra. Meliza Lopez MSc. di Psymia.
Dr. Van Gaalen a ilustra e situacion actual na Aruba pa locual ta trata salud mental (‘De situatie op Aruba’). Durante su presentacion a trata e trabao di Respaldo, sorto di casonan cu sa presenta na Respaldo, e lista di espera na Aruba y expectativa pa cu futuro di cuido mental na Aruba.
E dia a sigui cu informacion tocante e situacion patras di portanan di cas (‘De situatie achter de deur’) cu a ser presenta pa Janine Rodriquez di Bureau Slachtofferhulp KPA. E mentornan a haya informacion tocante e manera di opera di Bureau Slachtofferhulp KPA, casonan cu sa encontra, retonan y problemanan bao di nos muchanan y hobenan, y e problemanan tocante salud mental cu ta tuma lugar.
Por ultimo e mentornan a ricibi informacion y instrumentonan for di Meliza Lopez MSc. Di Psymia pa asina nan por yuda nos muchanan y hobenan cu tuma contacto cu Fundacion Telefon pa Hubentud Aruba. ‘Complexe Trauma’, ‘Depressie’, ‘Rouw’, ‘Posttraumatische Stresstoornis’ ta e aspectonan cu Meliza Lopez MSc. a trata durante ‘Deskundigheidsbevordering Dag’ Ningun Grito den Silencio.
Tin acontecimientonan cu por tuma lugar cu un persona den bida cu por conmove profundamente. Na momento cu un persona tin diferente experiencia traumatico, por ser papia di ‘complex trauma’. Na momento cu un persona tin depresion e ta sufri mentalmente. Depresion ta un enfermedad complica. Perdida di algo of un persona por ta doloroso. Con nos ta trata perdida ta ser yama ‘rouw’. Posttraumatische Stresstoornis’ ta un reaccion di stress intensivo pa un temporada largo ariba un suceso di impacto grandi. Suceso di impacto grandi ta sucesonan manera accidente, violencia fisico of sexual, violencia domestio, incest, desastre natural of guera.
E Mentor di Fundacion Telefon pa Hubentud Aruba a ricibi informacion y instrumentonan pa traha cune, tocante e disciplinanan ariba menciona pa asina nan por ta mihor ainda prepara na momento cu e mucha y hoben tuma contacto cu Telefon pa Hubentud. ‘Deskundigheidsbevordering Dag’ ta un di tres training grandi cu Fundacion Telefon pa Hubentud Aruba ta organisa pa train su mentornan tur aña y e aña aki tawata e di 22 biaha cu a organisa esaki.
Fundacion Telefon pa Hubentud Aruba kier a gradici sr. Van Gaalen, sra. Janine Rodriquez y sra. Meliza Lopez pa e cooperacion brinda.
