E protestanan di Nigel Maduro despues di dia 18 di maart y 27 di April a sigui den un forma di un beach party, esaki a keda haci 5 siman tras di otro tur diadomingo na diferente lama unda cu hotelnan ta wordo construi. E protestanan a wordo haci dilanti di Hilton Aruba, st Regis Resort , Ibero star Eagle Beach y ultimo tabata na Baby Beach.
Segun Nigel Maduro na Baby Beach kier a trece tur hende hunto pa preserva nos cultura di sinta na lama tur diadomingo cu nos famia y nos comunidad y na mes momento hacie un dia educativo na unda cu tabatin workshop riba sostenibilidad y riba e maneho di desperdicio na Aruba. Tambe tabatin creacion di arte. NA Baby Beach por a tuma nota di e comunidad ta bini hunto y crea y hasta tabatin turistanan cu a bin sinta hunto cu e grupo. Na e mes un siman cu a protesta na Ibero star, mester a subi un palo di kwihi pa para e trahadonan di sr Regis Resort pa nan corta un palo di Kwihi cu ta hopi mas bieu cu nos tur riba Aruba.
Tambe den e delaster protesta na Baby Beach tabatin un incidente cu un turista unda cu e turista a trata di core e grupo for di e palapa y a puntra si a paga pe y of si a reserva y a bisa no y a trata di core e grupo for di e spot cu ta nos lama. Esaki ta e realidad cu e Arubianonan ta biba riba nan propio isla, esaki ta un situacion cu ta pasando diariamente cu nos propio hendenan Arubiano cu ta biba riba e isla aki. Nos Arubianonan ta wordo pusha afo for di nos tera.
Segun Nigel Maduro nos gobernantenan a pusha un narativo unda cu a indica cu e grupo tabata agresivo y violento, mientras tanto a documenta full e dia cu por tuma nota cu a invita tur e turistanan y local nan pa bin sinta cu nos pa nan siña di nos kico ta sostenibilidad na Aruba.
Loke cu ta hala hopi atencion ta dicon loke cu a sosode a bay riba e turista su perspectiva y no di e local nan. Ta pone hopi atencion riba e turista y no e local nan, Nigel Maduro ta kere cu mester scucha di e local nan nan tin hopi di bisa.
Loke ta un realidad ta cu e gobernantenan no ta ignorante nan sa kico e local nan ta pensa. Ultimo tabatin un encuesta den colaboracion cu minister di turismo y ATA unda cu a haci un encuesta local pa asina tin un bista di locual e local ta pensa riba e industria di hotel y turismo. E encuesta aki a keda conoci na 2017-2022 y e resultadonan tabata mustra cu ciudadanonan local ta prefera desaroyo social enbes di desaroyo economico. E comunidad Arubiano ta prefera di crece socialmente enbes den e area di hotel y turismo.