ORANJESTAD,Aruba
No ta for di awor fraccion di AVP a bin ta mustrando riba e caos grandi cu ta existi den sistema educacional di e pais pero na varios ocasion a pidi pa reunion publico pa atende cu e Minister di Enseñansa riba e situacion delicado aki pero simplemente e peticionnan aki ta wordo neglisha por completo pa Presidente di Parlamento, Ady Thijssen.
“Mas y mas, practicamente tur dia nos ta ricibi informacion di e situacion caotico cu tin den enseñansa caminda tanto esunnan envolvi manera maestronan, mayornan y hasta studiantenan mes, ta mustra nan preocupacion grandi pero for di gobierno ta informacion so nos ta ricibi kico e minister tin pensa di haci.
Cu Colegio ta bay cay bou di un stichting combina, pues nada concreto, nada sigur y simplemente ta un caos cu Aruba na e momentonan aki no tin mester di e tipo di maneho aki sin pia ni cabes.
Ta momento pa mi haci un apelacionnan riba otro coleganan den Parlamento, hasta esunnan cu ta sostene gobierno, pa por fabor nan controla gobierno, ya cu esey ta trabou di Parlamento y den e situacion cu Aruba ta pasando aden na e momentonan aki, tur mester para riba un liña pa asina sigura cu nos ta controlando e decisionnan cu e gobierno aki ta tumando.
Gobierno mester traha pa pueblo y no pueblo ta traha pa gobierno y awe nos por wak esaki un biaha mas caminda Hulanda ta bolbe pone presion riba gobierno di Aruba pa haya fiansa, caminda gobierno di Aruba mester a haci for di basta tempo caba y caminda a priminti di lo haci esaki, esta di baha gasto di personal di gobierno.
Un situacion cu gabinete Wever Croes a crea dor di su ministernan, caminda esunnan cerca di e gobierno aki, esta friends and family, caminda gobierno no ta corta den e grupo aki, mientras cu e trahado Arubiano, e ambtenaar si ta mira su salario wordo corta y ya ta pasando den momentonan sumamente dificil financieramente.
Nos mester para hunto y exigi di gobierno pa corta den su gastonan, den e grupo cu nan a trece den gobernacion hunto cu nan y esaki ta momento caminda friends and family y un grupito ta sigui enrikece nan mes y bo ta haya cu pueblo si ta sufriendo na e momentonan aki.
Mi ta kere ta un momento serio caminda Hulanda ya a wak esaki caminda e posibilidad ta existi cu gobierno Hulandes lo bay manda un supervision extra pa mira con gobiernot a atendiendo cu e parti aki, prome cu gabinete Wwever Croes sigui haya financiamento for di gobierno Hulandes.
Ta un control extra di Hulanda mirando cu gabinete Wever Croes no ta haciendo un trabou responsabel pa trata di e asunto di aumento di gasto di personal dor di gobierno actual y parlamento den su totalidad tin cu hiba un control mas amplio riba e direccion cu e gobierno actual kier bay.
