Na tur yu-di-Kòrsou: Nos no ke despensa nos ke rèspèt!

Apresiado kompatriota,

Tur akshon kaminda ta trata na konsiderá Hulanda un entidat honesto i korekto ku por dil algu kuné nos ta detestá

Pasobra Hulanda no ta di konfia i no ta di buena fe. Mira Hulanda su partisipashon den asuntunan di BES i islanan CAS/CHE/COHO.

Ku Hulanda debe nos algu ta bèrdat. Sigur no di tempu di sklabitut so pero tambe pa daño ku el a hasi nos despues di 1863 te awe. 

Mas bien loke nos ta eksigí di Hulanda ta simplemente pa e kumpli ku su deber komo kolonisadó. Kumpli ku Karta Magno i no stroba Kòrsou pa hasi uzo di su derechi liber i demokrátiko di outodeterminashon.

E punto mas kardinal pa nos ta esei i no e plaka di reparashon. Hulanda ya a mustra ken e ta ora el a ataká Indonesia pa kita su independensia i hasié kolonia hulandes bèk, siendo ku Karta Magno di Nashonnan Uni ta obligá tur pais ku kolonia pa yuda nan kolonia dekolonisá. Pues faltamentu serio ku su responsabilidat komo pais ku tin kolonia.

Hulanda na vários okashon a trese dilanti ku firmesa ku e no ta pidi pordon pa su parti den sklabitut i komèrsio di katibu. Un mayoria den Tweede Kamer a opiná tambe ku nan no ta haña ku e historia di Tula mester drenta kuríkulo di historia den skolnan di Hulanda.

E manera ku Hulanda ta profilá ku e.o. CHE/COHO i ku “geschillenregeling” tambe ta sufisiente motibu pa rechasá Hulanda komo pais serio, honesto i dediká. Hulanda ta riba un trayekto su so, pa bienestar pa su so.

Nos di Kousa Promé hamas lo pidi òf eksigí di Hulanda pa pidi despensa ni pordon.

DESPENSA ta un balor masha sagrado den nos kultura. Ta esun ku faya i ku ta kulpabel ta rekonosé i aseptá su fayo i ta diskulpá pasobra el a repentí i ta konvensí ku e mester drecha loke el a faya kuné i ku e mester sòru pa loke a pasa no pasa nunka mas. Den un kaso asina e despensa ta sali di bo mes kurason. Niun alma no mester pidi bo. Diskulpa i despensa ta basá riba KONFIANSA i HONESTIDAT.

Un pais manera Hulanda a demostrá di ta sin bèrgwensa i lo no ta serio i hamas lo pidi pordon. Te na ora ku e pidi pordon mes, lo e gaña bo mata igual ku e promesanan hasí na eks promé minister Miguel Pourier ku nunka el a kumpli kuné .

Al kontrario, nos ta na fabor di algu sumamente importante den e kuadro aki: konsientisashon históriko i polítiko di nos pueblo. Un pueblo ku lastimamente a ser tené ignorante i ku a sufri di silensio i di falsifikashon di historia. Un pueblo humilde ku ta karesé di konosementu di su historia propio, di komersio transatlántiko i di e barbarismonan kometé pa Hulanda aki na Kòrsou, Sürnam i Indonesia .

Nos lo duna prioridat na konsientisashon pa yega na un pueblo emansipá. E ta un proseso ku ta kana pokopoko pero sigur. Meskos ku hopi otro pueblo esun di Kòrsou tambe un dia ta yega. 

Kon pokopoko ku e ruta ei ta, pa nos ta e úniko ruta korekto pa kana. Esaki sam sam ku e lucha sagrado pa konkistá gobernashon di Kòrsou.

Ki dia Kousa Promé lo eksigí pago di reparashon serka Hulanda? Nos lo eksigí esaki na momento ku nos logra dekolonisashon total for di Hulanda. Kòrsou lo ta e arkitekto prinsipal di su propio dekolonisashon. Na e momento ei nos lo djòin komo pais soberano, tur lucha di reparashon, entre otro tambe esun di paisnan soberano di CARICOM, kaminda nos tambe lo ta un miembro prominente. 

Miéntras nos ta kolonia, pidimentu di reparashon ta igual ku pidi Hulanda saku di plaka atrobe pa solushoná dañonan ku nos a sufri pero ku un biaha mas atrobe nos lo no logra eliminá di e forma ei. Ripitishon di historia no ta trese kambio, pero mas bien ta ripití eror tras di eror. Atrobe nos lo frakasá pasobra gobièrnu i parlamento di Kòrsou ku mester duna guia na e lucha sagrado aki di pueblo, ta sosio fiel di Hulanda. Nan lo kumpli kabalmente ku loke ministerio di Binnenlandse Zaken en Koninkrijkrelaties instruí nan pa hasi. 

Pidi plaka na Hulanda lo sigui hasi nos katibu di Hulanda i víktima di limosneria. Nunka e sakunan di plaka hulandes a yuda nos. Nos tur sa bon bon kiko a pasa ku tur e sakunan.

Atrobe nos ta kreando e impreshon ku ta Hulanda ku su plaka di reparashon so lo por kura i emansipá nos. Esei lo yuda alehá nos un biaha mas di e pensamentu ku nos por i ku nos mes por lucha pa liberá nos mes di dominio hulandes. Hulanda a kolonisá, deskriminá, sklabisá, eksplotá i bende nos avochinan riba merkado mundial i awe nos ta na su porta atrobe pa pidié plaka pa yuda nos emansipá.

Hulanda lo ta kontentu si Kòrsou drenta den e ruta di pidi plaka pa pordon. E lo chèrcha nos i bisa: “Mira nan ku man habrí atrobe. Ta nos mes komo nan kolonisadó i nan esklavista lo mester paga pa kura nan”. 

E úniko lucha berdadero aktualmente ta pa yuda konsientisá pueblo di Kòrsou i evitá di kai den un lucha masal di pidi limosna. Pasobra atrobe lo e bira un fila largu i tristu di yu di Kòrsou na rudia ku man habrí pará dilanti Hulanda pa pidi i risibí pago di reparashon. 

Mirando e polítika aktual di gobernashon na Kòrsou nos tin sigur ku e montante astronómiko ku vários hende ta soña di lo haña di reparashon serka Hulanda, lo ser gastá den infrastruktura, konsùltent i invershon den preparashon di tereno pa kapitalistanan konstruí hotèl i resòrt. E plaka di reparashon lo rende riba Kòrsou i regresá Hulanda i hasi Hulanda un biaha mas, mas riku atrobe.

Nos ta di opinion ku kada pida montante di plaka ku Kòrsou risibí di impuesto i ku e generá di su propio aktividatnan produktivo, mester bai entre otro na invershon produktivo den edukashon, enseñansa, deporte, vitalisashon di bario, industria nobo basá riba eksportashon i proyektonan di konsientisashon i empoderashon di e yu di Kòrsou. Akshonnan pa eliminá e krísis di identidat i establesé patriotismo i amor pa Kòrsou. Patriotismo i amor pa Kòrsou ta e arma mas poderoso di pueblo. Mester kibra ku ignoransia i promové konosementu pa por avansá.

E mihó alimento pa e lucha di emansipashon, rekonosimentu i rekonkista di bo mes ta amor pa bo mes, amor pa Kòrsou. 

Kiko mester sosodé ?

Tur esnan ku ta kere den forsa di Kòrsou i den e yu di Kòrsou mester uni pa reforsá e lucha di dekolonisashon. Ta únikamente ku lucha di un pueblo konsiente i sabidó, por pone Hulanda kumpli ku su deber di dékolonisashon, manera ta pará den Karta Magno di Nashonnan Uní. 

Kòrsou no por aseptá despensa di Hulanda miéntras e tin nos ainda komo kolonia, ku su rudia riba nos garganta. E rudia riba nos garganta ta: Leinan di Konsenso, e.o. COHO, TWO i BZK, Gobernadó den Fòrti, CFT, Statuut i Grondwet di Hulanda.

Nos mester lucha pa rekobrá nos outonomia, eliminá leinan di konsenso, eliminá gobernadó, deshasí di Statuut i traha un konstitushon nobo.

Poko poko bira doño bèk di nos teritorio i nos rikesanan. 

E lucha ta pa yega na un Kòrsou INDEPENDIENTE.

E lucha sagrado pa un Kòrsou liber i independiente ta sigui ¡!!!