Minister di husticia Rocco Tjon ta duna di conoce cu Respaldo lo bay expande nan servicio. Ta importante pa sa cu na november 2021 a firma cu PAHO un plan pa largo plaso con lo atende cu salud mental y adicion na Aruba. Tambe december ultimo a firma un acuerdo pa tur departamento cu ta traha den e area aki pa nan traha hunto. Cu esaki a percura pa tur departamento cu tin un rol pa atende cu e tematica di salud mental mester traha hunto.
Na momento cu ta trata di salud mental y adiccion no ta trata solamente cu ta cay bou di e sector medico, sector social y sector di enseñansa, pero ta hopi importante pa tin un palabracion caminda tur e diferente sectornan aki ta bini hunto pa atende cu e tematica aki. Si mester tuma nota y haci un analisis di e finansas cu ta keda aloca pa atende cu e tematica aki, ta mira un aumento enorme for di 2021 , 2022,2023 y 2024 unda cu por anuncia cu tambe den e presupuesto 2025 tin aumento significante pa tur departamento cu ta atende cu Salud mental y adiccion.
E maneho di salud mental y adiccion ta riba prevencion , e segundo pilar ta e cuido basico y cuido specialisa y e di tres pilar ta e nazorg. Minister di Husticia Rocco Tjon ta duna di conoce cu den tur tres pilar a inverti masha hopi mes.
Riba prevencion FADA ta percura pa bay na tur e scolnan y centronan di bario ta hopi mas grandi. Dos siman pasa a presenta loke cu tur ta wordo haci den veiligebarios y por tuma nota cu tin hopi programa di sosten ta keda brinda na e momentonan aki na esunnan mas venerabel, hobennan, adultonan mayor, pero tambe na nos hendenan muhe cu tin mester di esaki.
Na momento cu ta papia di prevencion no ta papia solamente di bin cu un liña di telefon caminda cu un hende por yama, pero tin hopi mas cu ta cana tras di e problemanan aki. Por mira mas y mas tanto internacionalmente y nacional mester inverti mas den programanan social pa brinda e individuonan den nos comunidad e sosten pa di e forma ey nan no bay sufri di adiccion of di salud mental.
Un persona cu ta keda confronta cu e reto di salud mental y adiccion hopi biaha tin problema familiar, financiero, bullying ect ect , pesey mes ta inverti den hopi di e programanan social pa trece consciencia pa no drenta den e circulo di salud mental y adiccion.