ORANJESTAD,Aruba
Sigur ta un momento cu ta yena nos cu hopi emocion ora di a ricibi e noticia di e participacion di morto y cu sr. Celestino ‘Miro’ Dabian ya no ta cu nos mas. Miro a bay laga nos riba e marduga di 2 di juni 2020. Un persona, hende di tur hende cu semper tabata cla pa yuda, den duna conseho, amante di politica, y sirbido di su pais Aruba.
Celestino ‘Miro’ Dabian a nace na Aruba riba 6 di april 1944 y for di Balashi # 35 a sali bay studia na Hulanda.
Miro ta yiu di sr. Candito Dabian y sra. Petra Dabian Rosel y den su infancia a biba na Balashi # 35.
Miro a bay studia prome pa enfermeria, pero debi cu e no tabata por cu sanger a dicidi di cambia su estudio pa ‘gemeente administratie/bestuurskunde na Haarlem, Hulanda. Y a traha na Gemeente Bloemendaal tambe.
Despues di su estudio el a bini Aruba bek pa traha pa gobierno na Departamento di Asuntonan General y Huridico na Aruba. Den e tempo ey ta cera conoci cu sra. Odette Wever. Despues di a formalisa e relacion cu Odette nan ta casa na 1972. Di e matrimonio aki a nace 2 yiu, esta Caresse Dabian y Danilo Dabian. Prome cu e a drente e enlace matrimonial e tabatin un yiu homber Giovanni Dabian.
Na 1971 riba dia 9 di februari Miro ta bira co-fundado di e Partido Movimiento Electoral di Pueblo hunto cu sr. Gilberto F. Betico Croes awe d.f.m.
Miro semper tabata gusta politica y esaki ta bini di tanto su kerido tata Candito y mama Petra. Miro durante henter su bida tabata un fiel luchador di e causa Arubano.
Den 1973 Miro tabata traha na Departamento di Asuntonan General y Huridico y tabata riba lista di MEP como un di esnan cu a funda Partido Movimiento Electoral di Pueblo.
Na 1974 Miro a bay Hulanda bek pa traha na Cas di Antiyas (Antillenhuis) pa hopi aña, te ora cu Cas di Aruba (Arubahuis) a keda funda na 1982. Miro a bira e prome director na Cas di Aruba. Despues hunto cu ing. Roland Lacle, mr. John v/d Kuyp, mr. Henry Fingal, sra. Astrid Kelly, Nanda Veerman y Edwin Illidge nan a lanta Arubahuis.
Miro hunto cu Henry Fingal (entre otro) nan a promove Aruba den Europa como destinacion di vakantie. Nan a logra pa busca un Serie Hulandes pa haci grabacion na Aruba. E Serie tabata Medisch Centrum West. Tambe e tempo ey nan a logra manda un grupo di muchanan di lagere school pa competi den e TV-Show na Hulanda.
Miro a desplega un tremendo trabou, inpagabel por cierto, dia y anochi tabata asisti, y yuda tur studiantenan Arubiano na Hulanda. E tabata un di e motornan hunto cu awe den feliz memoria ing. Roland Lacle pa organisa e prome ‘Aruba – Dag’ den Congres gebouw na 1982 na Den Haag. E contactonan entre Aruba y Hulanda, Miro tabata practicamente tur dia den contacto ya cu e tabata haci e contactonan pa sr.Betico Croes d.f.m. y nos bestuurscollege aki. Na Hulanda e tabata lobby pa nos di Aruba etc. y hopi mayornan cu tabata acudi cerca dje pa yuda nan yuinan den cualkier necesidad y problema. Miro tabata incansabel den su trabou, pero e tabata hacie cu placer, amor y tabata un homber masha chistoso. Su hari ta unico y e gusta tenta hende ora e kier hari un poco. Miro a pasa den hopi cos na Hulanda pa Arubianonan y e recuerdonan ta inolvidabel. Miro tabata un consehero pa trahamento di lista di partido MEP.
Miro a traha na Arubahuis pa hopi aña na Departamento di ‘Afdeling Onderwijs’ na Hulanda pa studiantenan cu tabata bay studia na Hulanda.
Tambe Miro tabata un di e pioneronan di e “Vertegenwoordiger van Aruba in Nederland” na 1983. Sinembargo manera e mes a bisa sr. Betico Croes a haci un apelacion riba dje pa keda traha na Antillenhuis te cu Status Aparte p’asina Aruba tin wowo y orea den loke ta sosode na Antillenhuis.
Na momento cu Aruba a haya su Satus Aparte na 1 di januari 1986 y e “Vertegenwoordiger van Aruba” a bira Gabinete di Minister Plenipotenciario di Aruba.
Durante di su trayectoria di trabao na Arubahuis Miro a traha como onderwijscoordinator. Den e funcion aki e tabata un persona hopi stima pa tanto e mentornan y e studiantenan. Miro por tabata streng, pero semper a saca un man na yuda un studiante cu ta den problema. E tabata director na Arubahuis te cu 1997.
Despues di e su trabao pa Pais Aruba, Miro tabata director di Boogaard Assurantiën na Aruba.
Tabata na 1998 Miro a bay Aruba pa yuda Jan Boogaard pa set-up Boogaard Assurantie N.V. Esaki tabata tanto pa Aruba y Antiyas.
Pa hopi hende sr. Dabian, tabata meneer Miro of simplemente Dabian.
Despues di a traha varios aña na Antillenhuis y Arubahuis, Dabian a dicidi di regresa Aruba na final di añanan 90 y cinco aña despues su esposa a regresa tambe.
Momento cu mayoria di hende ta pensa riba nan pensioen, Dabian a dicidi di tuma un reto nobo aki mes den sector priva. Dabian a tuma e encargo di General Manager di Boogaard Assurantiën N.V. Cual empresa a establece su mes aki na Aruba na 1997 y tabata consisti di apenas 6 empleado, di cual ainda algun ta forma parti di e famia di Boogaard Assurantiën N.V.
Durante e añanan cu a transcuri, e empresa a sigui crece y asina e bira e broker mas grandi den nos region cu hermana empresanan na Corsou, Boneiro y St. Maarten.
Awe cu hopi dedicacion, perseverancia y cu un compromiso na su clientela, Boogaard Assurantiën N.V. por ta orguyoso cu su 55 empleadonan y mas di 25.000 cliente na Aruba.
Algun palabra y/of storianan di Miro, of simplemente manera E tabata ta:
.
• Su tempo na Hulanda
Storianan increibel di cosnan cu e tabata ‘maak mee’ cu e studiantenan na Hulanda. Remarcabel ta cu nunca sr. Miro Dabian tabata menciona nomber di e studiante(nan) concerni, na momento cu e tabata conta su storia.
• Di con su tata den feliz memoria como empleado di LAGO nunca a yega laat trabao of a ‘meld ziek’
Esaki tabata forma parti di Sr. Dabian su repertorio ora empleadonan di Boogaard Assurantie N.V. yega trabou laat of ‘meld ziek’.
• Di su dianan largo ora E bay den exterior pa trabao
Specialmente ora e bay Merca, manera semper e ta bisa “bay congreso”, cual ta encera reunionnan, seminario of workshops for di mainta 8or te cu 1or of 2or di marduga na companianan renombra manera Walmart, Ross of Burlington.
• Di e bon resultado cu e ta logra ora di bay therapie
Poco hende sa kico exactamente Dabian kiermen cu esaki (tabata referi na Casino).
• Tabata un experto den
Con pa duna servicio na cliente nan di Boogaard Assurantën N.V. y resolve problema.
• Tur ora bon documenta
Semper miho cu Censo di Aruba.
• Un joker
Sigur cu si, gusta su chasconan y tur ora alegre.
• Su caracter
Dabian por discuti fuerte cu bo, pero na final di cuenta ta caba cu un carisma yena di humildad. Semper cu su curason ‘in the right place’.
• Happy Hours den compania di Boogaard cu e empleadonan:
Un tabata tin un diabierna caminda cu despues di un siman trahando duro y cu dedicacion, cu e famoso ‘happy hour’ por a falta. Ey por a scucha for di Dabian tur su anecdotanan cu atencion.
• Manera di bisti
Dabian por wel di no conoce bo, pero una bes cu bo tabata na oficina of den su presencia y bo manera di bisti no ta na su agrado, e ta laga bo sa. Y tur presente mester hari.
• Cla pa yuda
Bo por tin diferencia di opinion cu Dabian, pero na momento cu Dabian mester duna bo un man, e lo haci esaki sin pense dos biaha.
Sr. Miro Dabian semper tabata bisa: “Nos ta aki pa brinda servicio na nos clientenan, NO LUBIDA ESEY, SIN NAN NOS NO T’EY”. Dabian por recorda bo esaki na varios occasion durante dia.
Asina por sigui, tin hopi mas cos cu por menciona di Dabian. Sr. Miro Dabian a laga Boogaard Assurantiën N.V. na Maart di 2016, p’asina e por a bay disfruta di su pensoen bon mereci. Sr. Dabian a laga atras un empresa di cual e tabata orguyoso di dje. Caminda cu el a pasa temponan agradabel, conhuntamente cu tur empleado(a)nan, tin ora cu reto nan dificil, pero na final di dia e por a bisa,
“MI TABATA TIN UN BUNITA PERIODO CU E HENDENAN AKI”. Y e empleadonan tambe cu Miro!
Semper contento, alegre y cla pa duna un man. Imposibel pa lubida un ser humano asina, Kende tabata Unico!
El a traha den sector di aseguro te cu 2018..
Sin embargo na 2001 ela funciona un periodo corto como director a.i. di Arubahuis den espera pa nombracion di un director pa Arubahuis.
Un tiki di Miro den su periodo di MEP te su ultimo dianan:
Señor Nelson Oduber a bisa di cu su trayectoria di 25 aña como lider di MEP el a traha y entrega 7 lista pa eleccionnan. Problema mas grandi pa un lider ta busca candidatonan adecuado pa subi lista.. Sr. Miro cu Harry Croes tabata 2 pilarnan cu tabata yud’e wanta tur cos pa busca candidatonan nobo cu ta sumamente dificil den comunidad chikito. E ta masha agradecido na Miro pa a yude. Un di caractertica, cualidadnan di Miro ta; di bisa sr. Nel mes y tur otro hende nan berdad, anto si mester cu un smile! Desde cu Nel a traha e ultimo lista na 2009 y a sali for di politica, bida politico a muri un tiki pa nan, pero nan a keda interesa den kico ta pasa den MEP y Aruba. Nan contactonan a mengua, pero de bes en cuando sa topa. Nel ta sigur cu nos Creador lo recompensa Miro cu sosiego eterno pa tur su bondadnan cu Miro a haci. Y E ta hopi agradecido na su amigo Miro.
Cu Miro su recuerdonan lo keda graba den memoria di hopi di esnan cu a conoce, a traha cune di Kende E tabata ta y kico el a haci ariba e mundo aki cu su talento, pasion y amor pa su hendenan y pais Aruba.
Na November 2018 Miro a ricibi un plakaat di reconocimento na ocasion di 35 aña di existencia di Arubahuis for di Minister Plenipotenciario sr. Guillfred Besaril
Celestino ‘Miro’ Dabian un co-fundado y gran Baluarte, kende a aparece riba e prome lista di MEP na 1971, como candidato nr. 14.
Tabata falta 9 luna mas pa Miro por a celebra e di 50 aña di e partido cu el a yuda funda riba dia 9 februari 1971.
Cu Miro sosega na paz
EPSON MFP image 
EPSON MFP image 
EPSON MFP image 
EPSON MFP image 
EPSON MFP image 
EPSON MFP image 
