Riba Dia di Bandera, 2 yüli próksimo, Gobièrnu di Kòrsou ta bai entregá e kondekorashon Krus di Mérito. Di e forma akí Gobièrnu ta duna rekonosementu na personanan ku a i ta hasi aktividatnan digno di mérito pa komunidat di Kòrsou. E aña akí ta e di 19 aña ku Gobièrnu ta hasi entrega di e kondekorashon Krus di Mérito.
Si bo ta un persona mayor di edat, di nashonalidat hulandes i ta biba na Kòrsou, bo ta bin na remarke pa bo presentá un kandidato pa risibí un Krus di Mérito. Pa presentá un kandidato, mester yena un formulario ku algun dato di bo mes i informashon amplio (foto) i balioso di e persona ku bo ta presentá. E informashon di e kandidato mester ta di ‘type’. Tur kandidato pa Krus di Mérito, mester ta riba 50 aña di edat.
E periodo pa atkerí informashon i entrega e formularionan di nominashon, ta entre 1 di aprel pa 1 di mei 2022. Esaki ta posibel serka Sektor di Kultura i Deporte na Bon Biní Business Center situá na Schottegatweg Oost 10 òf via di email na krusdimerito@gobiernu.cw. Por ‘download’ e formulario di inskripshon i e foyeto informativo ku e diferente kriterionan pa nominashon tambe via e website di Gobièrnu, www.gobiernu.cw.
Pa e foyeto i e formulario klik aki:
Foyeto KONDEKORASHON Krus di Merito 2022
Formulario pa presentá un nominado pa KONDEKORASHON 2022
Tambe, por mail i pidi informashon adishonal via krusdimerito@gobiernu.cw òf telefónikamente na 529-7369 entre 8’or di mainta pa 5’or di atardi.
Ban rekonosé mérito di nos mes hendenan i di e forma akí, pone nan komo ehèmpel bibu pa nos mes i nos yunan por sigui. Di e forma akí nos ta selebrá patriotismo i yuda forma un base sólido pa sigui konstruí nos nashon.