Pa promé biaha den historia di sine na Kòrsou, un proyekto lokal a keda selektá pa risibí fondonan di realisashon serka ‘Nederland Film Fonds’. Ta trata aki di produkshon di e pelíkula ‘E Liña Final’, basá riba un kuenta kòrtiku di legendario Frank Martinus Arion entitulá ‘De elegante Renners’. Pa medio di e fondonan di ‘Nederland Film Fonds’, ‘Caribbean Filmcom’ aki na Kòrsou ta risibí próksimamente un kontribushon di €950.000 pa realisashon di e pelíkula ‘E Liña Final’ na Kòrsou.
Na aña 2017, Ministerio di Desaroyo Ekonómiko (MEO) a lansa un asina yamá ‘Curaçao Film Office’ ku e meta pa desaroyá e sektor di sine aki na Kòrsou i hasi nos isla mas atraktivo pa produkshonnan internashonal. Komo parti di e maneho di ‘Curaçao Film Office’ durante e último añanan, e ministerio su Film Commisioner, sra Eloise van Wickeren a enfoká entre otro riba kreashon di mas posibilidat di finansiamentu pa nos propio sineastanan.
Esaki a bira posibel na Yanüari 2021 na momentu ku a habri e posibilidat pa sineastanan prosedente di Kòrsou hasi petishon pa fondonan na ‘Nederland Film Fonds’. ‘Caribbean Filmcom’ kende ta un kompania di produkshon di sine i programanan di televishon situá aki na Kòrsou a apliká pa e fondonan akí i ku orguyo ‘Curaçao Film Office’ a risibí grato notisia e siman akí ku e petishon pa fondo pa promé bia a keda onrá. Filmashon di e pelíkula ‘E Liña Final’ lo ta bou di guia di Produktor Michel Drenthe di Caribbean Filcom, na enkargo di e script lo ta Hesdy Lonwijk i e senario lo sosodé dor di Roelof Jan Minneboo.
