Na Korsou Frakshon di man ta kontentu ku gobièrnu a rekonsiderá pa fasilitá importashon di “ zelftest “ pa covid-19

Gobièrnu di Kòrsou a bai di akuerdo pa fasilitá importashon di “zelftest” pa COVID 19 atraves di un dekreto ministerial (MB) djabièrnè ùltimo.
Awor gobièrnu mester inklui e “zelftest” di COVID-19 riba e lista di produktonan preis maksimo pa produktonan di Covid 19 ku a wòrdu introdusí atraves di MB 2020 nr.17, dor di èks Minister di Ekonomia sra. Giselle Mc William.
Despues ku na komienso di desèmber ku a pasa den tratamentu di Presupuesto 2022, miembro di parlamento Giselle Mc William a hasi e pregunta na gobièrnu dikon no ta fasilitá e importashon di “zelftest”.
E kontesta risibí no tabata satisfaktorio i negativo pa ku e desaroyo mundial ku tin pa e testnan na alkanse di un di tur. Despues di tuma nota di e ola nobo di kontagio Frakshon di MAN a un biaha mas a hasi pregunta na Gobièrnu di Kòrsou riba e importansia di importá e “zelftest” di COVID-19. Un kantidat grandi di hendenan den nos komunidat tambe a vosifera ku ta desea di tin aksesibelidat na e tèstnan aki . Tur esaki a kondusi ku djabièrnè a ùltimo gobièrnu a bin ku un kambio di posishon i a akorda esaki atraves di un MB.

Awor ku esaki ta bai bira posibel ta importante pa salbaguardia e konsumidonan di posibel preisnan eksesivo di e “zelftest” nan aki, dor añadi e tèst aki na e lista di preisnan maksimo di produktonan di Covid-19. E lista aki a ser introdusi na mart 2020 dor di èks Minister Mc William, di manera ku ta protehá e konsumido su aksesibilidat pa por kumpra e produktonan aki.
Banda di esaki ta importante pa inisia un kampaña di informashon kon ta usa e tèstnan aki manera RIVM Hulanda ta hasiendo pa ku e tèstnan aki i konsientisá e importansia di keda akudi na GGD na momento ku e tèst sali positivo, pa Gobiernu por sigui haña data/informashon pa ku su maneho di Covid.
Ku importashon di e zelftest ta yuda nos krea un maneho mas inklusivo pa ku Covid i asina tambe duna oportunidat na esunnan ku no por bakuna of ke bakuna e posibilidat pa keda funshoná den nos komunidat.
Mientras ku e “zelftest” mester bira un “game changer “ pa farandula i komèrsio na momento ku esaki wòrdu usa segun maneho di gobièrnu ku mester keda añadi pa ku maneho di Covid-19 aktual.