Despues ku djamars 12 di yanüari último Minister di Salubridat, Medio, Ambiente i Naturalesa (GMN) señora Zita Jesus-leito a tene un konferensha di prensa huntu ku ekspertonan di salubridat pa duna informashon na pueblo di Kòrsou tokante e programa di bakunashon, ta bai sigui ku informashon ekstenso na representantenan di pueblo, kual ta Parlamento di Kòrsou.
Ministernan di área di Salubridat di Reino a bini ta reuní tokante e problemátika di Covid-19 pa asina konhuntamente trata na yega na mitigashon i solushon di e pandemia. Den kuadro di esaki Minister di GMN, na luna di òktober 2020, a aserka kolega Minister di Salubridat Públiko, Bienestar i Deporte di Hulanda pa inkluí Kòrsou den nan programa di bakunashon pa ku Covid-19. Di parti di Kòrsou a lanta un team di eksperto lokal ku ta hasi preparashon di e diferente aspektonan nesesario pa hiba un programa di bakunashon eksitoso. E grupo aki a bin ta traha i hasi preparashonnan for di mei mei di desèmber 2020 i awor ta asina lew ku por duna komunidat di Kòrsou i tambe representantenan di pueblo informashon konkreto tokante e loke nan ku mester tei “in place” pa por ehekutá e plan di bakunashon i tambe kiko konkretamente e plan aki ta enserá.
Resientemente Minister Zita Jesus-Leito a dirigí un karta na presidente di Parlamento ku e petishon pa organisá un reunion ya asina Minister por duna splikashon amplio na Parlamentarionan di Kòrsou i tambe kontesta nan preguntanan tokante e programa di bakunashon di Covid-19 ku pronto lo kuminsá na Kòrsou tambe, meskos ku diferente otro paisnan na mundu. Pa Minister Zita Jesus-Leito esaki ta un stap mas pa sigurá i krea un bida salu i felis pa nos komunidat.
