Esei segun nos plan di bakunashon. Den e promé fase di e plan akí ta bakuná trahadónan den kuido di salú ku tin kontakto direkto ku pashènt. Ta trata di enfermera, enfermero, dòkter di kas, trahadó den institutonan di hende grandi, fisioterapista etc.
Tin mas o ménos 600 trahadó den kuido ta bini na remarka pa bakunashon. Na Fundashon Mariadal nos ta bakuná otro siman riba djaluna 22, djamars 23, djaweps 25 i djabièrnè 26 di febrüari.
Den e preparashonnan pa bakuná nos a tene kuenta ku e kondishonnan pa sòru ku por pasa angua na un manera seif i ku bakunashon ta di bon kalidat. Asina nos por bisa ku nos a tene nos mes na e reglanan di RIVM. Nos a dediká atenshon na preparashon di e bakuna i e manera pa ènter hende. Tur miembro di e timnan di bakunashon a haña un treinen. Nos tin tim médiko i tim ku ta duna sosten, nan ta sòru pa e bakunashon kana sin problema.
Nos meta ta pa otro siman pa dia 160 trahadó den kuido di salú haña e di promé angua. Nan ta haña e di dos angua despues di tres siman. Esei ke men ku na mart nos ta bakuná e trahadónan den kuido di salú atrobe. Na Fundashon Mariadal ta bakuná e trahadónan den kuido den e edifisio bieu di FORMA. E lugá ei ta basta grandi pa bakuná hopi hende miéntras ku tur hende por tene nan mes na e reglanan di corona.
Nos ta kla pa ranka sali. I nos ta konfia ku e bakunashon den e promé siman i durante e simannan despues esei ta kana bon.
