Dialuna 1 di maart Centro di Bario Savaneta a ranca sali cu un programa di actividad nobo pa 2021. Desde cu obligatoriamente mester a cera nos portanan y cancela tur actividad door di e pandemia mundial, nos centro a habri su portanan bek. Cu un Directiva nobo y un coordinadora di actividad nobo; nos ta cla pa ofrece comunidad di Aruba, en particular di e bario di Savaneta, un programa varia y pa tur edad.
Coordinadora di actividad pa Centro di Bario Savaneta ta Roseline Manna. E tin amplio experiencia den organisa actividad, den desaroyo di proyecto y traha cu boluntario. Su meta a corto plaso ta pa por trece bida bek den Centro di Bario atraves di diferente tipo di actividad pero tambe pa brinda oportunidad pa comunidad mes bin cu nan idea pa proyecto/actividad. E meta pa largo plaso ta pa haci Centro di Bario Savaneta uno sostenibel. E idea di e programa nobo ta pa brinda consistencia den nos programacion di siman. Pesey nos tin un actividad general tur dia den siman. Di e manera aki por sa exactamente kico lo ser
ofreci y por planea pa atende esaki di antemano. Riba dialuna, diamars y diahuebs lo enfoca riba cursonan pa mucha y adulto; esaki lo varia entre EHBO, programa pa Tata, les arte, teatro, deporte y mucho mas.
Diaranson nos muchanan, edad 4 pa 12, por participa cu Sport en Spel, esaki lo ta di 3 pa 5 pm. Esaki ta ser organisa pa lidernan cu experiencia den weganan recreativo. Riba diaranson anochi lo tin encuentro informativo; pa esaki nos lo ta colaborando cu diferente organisacion social cu lo comparti cu e participante nan area di experticio. Riba diabierna lo tin actividad recreativo, por ehempel anochi di pelicula.
Aparte di e programa general lo tin diferente otro curso/workshop/les tumando luga na Centro di
Bario Savaneta. ‘Like’ nos Facebook page: Centro di Bario Savaneta y click ‘Follow’ pa asina sigui nos y keda
na altura di tur nos actividadnan. Nos lo comparti detayes di e curso, dia di inscripcion como
tambe prijs pa e actividad. Pa mas informacion di actividad, por manda un email na
actividad.cbs@gmail.com of tuma contacto cu Roseline via whatsapp na 569-3900.
Sigur nos lo tene bon cuenta cu tur rekisito stipula pa DVG pa cu COVID-19. Nos centro ta ser
hasi limpi frecuentemente y ta ekipa cu hand sanitizer na tur entrada. Nos ta pidi tur bishitante
pa bisti tapaboca ora di bishita e centro y mantene nan mes na tur regla vigente.
