Biblioteca Nacional Aruba ta presenta e aña aki tambe, un buki special pa su Festival di Buki pa Mucha. E buki aki ta un regalo pa e muchanan di Aruba. ‘Na cas di Carmen y Carlos’ ta inspira pa e tema ‘Mi buki, mi cas’. Autor ta Jeroen Hoogerwerf y e buki a keda ilustra pa artista visual Vanessa Paulina. Tur dos ta participa tambe na e festival y ta bishita diferente scol pa conta storia. ‘Na cas di Carmen y Carlos’ ta un buki na 2 idioma, Papiamento y Hulandes pa asina e ta accesibel pa hopi mucha na Aruba y talbes tambe den exterior.
Esaki ta un storia di un famia cu ta pasa un vakantie masha dushi mes. Carmen y Carlos ta prima y primo y nan ta mustra e lesado con cos ta bay cerca nan na cas. Jeroen Hoogerwerf y Vanessa Paulina ta kere den stimula lesamento y ta duna tur nan aporte, talento y energia na e Festival di Buki pa Mucha ya pa hopi aña caba.
Biblioteca ta organisa e Festival di Buki pa Mucha pa stimula tur mucha na Aruba pa lesa. Y biblioteca ta invita tur mucha na Aruba pa bira miembro y asina lesa hopi mas buki. Pa stimula lesamento poco mas, miembrecia pa mucha y hoben ta completamente gratis.
Por haya e buki gratuitamente na tur libreria ora cumpra un buki pa mucha, tanten cu tin. ISBN 978 90 83306 65 0
Biblioteca Nacional Aruba ta publica e buki cu sosten financiero di Kiwanis Club of Palm Beach, Quota International of Aruba, Amsterdam Manor Resort, De Wit & van Dorp, Plaza Bookshop, Plus Accountants y SETAR N.V.
