E sifranan di kontagio den e siman di 17 di yanüari 2022 ta mas abou ku e
siman promé, pero ainda ta muchu tempran pa papia di un berdadero bahada. Asina dòkter
Loes Jaspers di departamento di Salubridat Públiko ta duna di konosé, despues ku el a
investigá e kantidat di kontagio den periodo di 1 di yanüari te ku 23 di yanüari 2022. Den e
siman di 17 di yanüari 2022 kompará ku e siman promé, nan a hasi ménos tèst. Ora ku hasi
ménos tèst, esaki ta nifiká tambe ku ta haña ménos kaso di kontagio. P’esei ta bon pa warda
i wak si e bahada di siman pasá ta kontinuá den e tempu binidero.
Di e hendenan ku a pega ku e variante di ómikròn te ku 23 di yanüari 2022, 30% tabata den
e grupo di edat di 0 – 19 aña. Den e siman di 17 di yanüari 2022 e kantidat di kontagio a
oumentá konsiderablemente serka mucha den edat di 4 – 11 aña. E kantidat a bira asta
dòbel kompará ku e siman di 10 di yanüari 2022. E kantidat di hende di 60 aña bai ariba ku a
pega ku e vírùs, a subi levemente den e siman di 17 di yanüari 2022, miéntras ku serka
hendenan den edat di 20 – 59 aña e kantidat a baha kompará ku otro gruponan di edat.
Te ku awor en total 21 hende kontagiá a keda interná den hòspital na nos isla desde yegada
di e variante di ómikròn na fin di aña 2021. Di e hendenan kontagiá ku a keda interná den
hòspital, e promedio di edat ta 61 aña. Kompará ku otro gruponan di edat, hendenan di 60. aña bai ariba tin mas tantu chèns pa hospitalisashon den kaso di kontagio ku e variante di
ómikròn. Esaki tabata asina tambe ku e variante di dèlta.
Mitar di e hendenan ku for di fin di aña 2021 mester a keda interná den hòspital pa motibu di
e variante di ómikròn, no a pasa e dos anguanan, e otro mitar di e hendenan sí. Den kaso di
e variante di dèlta esaki tabata otro. E tempu ei solamente 22% di e pashèntnan di corona
interná den hòspital a pasa e dos anguanan kontra corona. Serka hendenan ku a pasa e dos
anguanan kontra corona, e protekshon kontra e vírùs di corona ta bira ménos despues di
algun tempu.
Pa e motibu akí Salubridat Públiko ta konsehá hendenan ku a pasa e dos anguanan kontra
corona kaba, pa pasa e angua di buster tambe. Te ku awor no a interná ningun hende ku a
pasa e angua di buster den hòspital pa motibu di corona. Esaki ta nifiká ku e angua di buster
ta protehá bon kontra keho serio, ora ku un hende pega ku e variante di ómikròn. I ku e
angua di buster ta protehá bon tambe kontra hospitalisashon.
Bo tin keho òf bo tin un resultado positivo di tèst di un tèst propio? E ora ei yama 0800 0800
pa traha un sita pa hasi tèst. Bo no a pasa e anguanan kontra corona òf e angua di buster
ainda? Yama 0800 0900 pa traha un sita pa pasa angua.
