Ta prolongá e medidanan di corona ku ta na vigor awor for di 19 di febrüari 2021 ku dos siman te ku 4 di mart 2021. Esei gezaghèber Edison Rijna ta laga sa. ,,Na prinsipio di febrüari e kantidat di infekshon tabata bou. Nos ta mira awor ku e kantidat di infekshon ta oumentá atrobe pa 18 di persona ku ta malu. P’esei a skohe pa no suavisá awor, sino prolongá e medidanan ku dos siman,” asina gezaghèber a deklará. “Si e sifranan subi mas, tin chèns ku mester intensifiká e medidanan mas.”
Boneiru ta keda den fase tres di riesgo ku e medidanan ku tin huntu ku nan. A ekspandé e plan di eskalashon. A agregá algun medida na e fase akí. Eseinan ta e siguiente medidanan:
Durante seremonia di kasamentu i ora di entiero por tin maksimalmente 100 persona presente si e espasio ta pèrmití esei. E espasio mester ta asina grandi si ku tur e 100 personanan presente por tene distansia di 1,5 meter for di otro. E medidanan no ta konta pa fiesta di kasamentu. Pa esei ta konta ku por usa maksimalmente 50% di kapasidat ku un máksimo di 50 persona. Bishitantenan mester registra i no ta pèrmití pa kanta òf balia. Pasadia pa hende grandi por tuma lugá si ta usa maksimalmente 50% di e kapasidat.
Ta pèrmití evento deportivo ku públiko for di awor den e fase akí. Esaki por solamente si e evento ta tuma lugá den aire liber i tin registrashon i un chekeo di salú. Tin mag di usa 50% di kapasidat, i tin mag di tin maksimalmente 50 persona den públiko. No ta pèrmití pa bende bibida alkohóliko. Ta hasi un yamada na organisadónan pa den e fase aki anda ku reserva ku atmishon di públiko. E sifranan no ta stabil abou ainda i p’esei por surgi un brote kualke momentu atrobe.
