Na Boneiro tin peticion pa cambia ley di cacho

Ley di cacho na Boneiro ta data di anja 1998 y miembro di conseho insular Dedi Coffie kier reemplasa esaki. Miembro di conseho insular pa M21, Desi Coffie den un carta na colegio ehecutivo ta trece dilanti cu den e Ordenansa Insular di 25 di juni 1998, nr. 2, reemplasando e Ordenansa di Cacho (A.B. 1961, nr. 14, articulo 3 insiso 1 y 2, tin para:

Insiso 1: Ta prohibi pa doñonan di cacho laga esakinan sin supervision riba caminda publico of riba un tereno cu ta accesibel pa tur hende.

Insiso 2: Cacho cu ta sin supervision riba caminda publico of riba un tereno cu ta accesibel pa tur hende, of riba un tereno cu un persona cu derecho pa haci esaki a pone accesibel, ta keda captura pa polis of pa personanan cu Colegio Ehecutivo a indica pa haci esaki.

Den articulo 12 insiso 2 di e mesun ordenansa tin para: Esun cu viola loke tin stipula den articulo 3, 8 y 9 di e ordenansa aki, ta keda castiga cu detencion di maximalmente 2 luna of un boet di maximalmente 5000 florin ($ 2793.30).

For di articulo 1 nos por deduci cu un hende cu saca su cacho un rato pafo di cura sin supervision pa haci su necesidad, ta castigabel. Tambe nos tin e cachonan cu ta scapa for di cura y cachonan supuestamente “sin doño” cu ta terorisa cunucunan y mata bestia di cunukeronan. Lamentablemente NO tin mantencion di e ley aki. Si for di aña 1998 a mantene e ley aki corectamente, e ora ey lo tabatin menos embaraso indesea cerca cacho y sigur menos of ningun incidente real di mordemento y  tambe menos problema cu cachonan cu ta mata cabrito. Ta trata pues di un problema cu gobierno mes a crea y tene na bida pa motibo di su actitud negligente di no percura pa mantencion di e lei durante tur e añanan aki. Ora cu tin molester, por cierto ta hopi mas facil pa pone e cachonan drumi of pa tira nan mata, pasobra e ora ey mesora a ‘soluciona’ e problema.

Den Articulo 477 di Codigo Penal BES tin para:

Ta castiga cu un detencion di maximalmente un luna of un boet di prome categoria:

Insiso 1: E persona cu sin cu ta necesario ta causa dolor of herida na un bestia, cu sin cu ta necesario ta tortura un bestia of cu sin cu ta necesario ta haci daño na salud di un bestia.

Insiso 2: E persona cu sin cu ta necesario, ta keda sin duna e cuido necesario na un bestia cu completamente of parcialmente ta pertenece na dje y ta bou di su supervision, y cu e ta obliga di duna cuido.

Den e situacion existente na Boneiro ta asina, cu ora un cacho sin cu ta necesario ta keda sin haña cuminda y ta desnutri, den mayoria caso ta confisca e cacho aki. Sinembargo no ta castiga e persona cu a causa esaki na e bestia y hopi biaha dentro di corto tempo e tin un otro cacho atrobe.

Na aña 2016 tabatin varios reunion cu Entidad Publico Boneiro pa motibo cu diferente organisacion di bestia a tende cu tabata pone cacho drumi, sin cu e doñonan tabata na altura di esaki. Sinembargo, despues di un aña y mey a saca sticker for di e consultanan aki. E gezaghebber di e tempo ey, a laga parce cu e organisacionnan di bestia no por a traha hunto y cu pa e motibo aki no tabatin sentido pa sigui. E berdad tabata, cu Entidad Publico Boneiro no por a haci loke e tabata ke, esta di saca un comunicado di prensa tocante tur loke a logra. Sinembargo nada no a keda logra. Cada biaha Entidad Publico Boneiro tabata cambia di opinion y nan no tabata cumpli cu nan promesanan tampoco.

Te cu e dia di awe e organisacionnan di bestia ta traha corectamente hunto. Pa motibo cu durante e ultimo añanan cada biaha tabata drenta mas keho, na fin di luna di maart 2022 Entidad Publico Boneiro a lanta un asina yama ‘Grupo di Trabou di Cacho’. E grupo di trabou aki lo a duna conseho tocante con lo mester a soluciona e problemanan cu molester. Te na e momento aki, un aña y mei despues di a lanta e grupo di trabou aki, te ainda no a haci net net nada. Segun e grupo di trabou a haci investigacion profundo relaciona cu con e problemanan ta surgi y a constata cu e problema tabata compleho. Remarcabel ta cu despues di un suplica pa haña e notulanan of pa mira e rapport tocante e conclusionnan, e grupo di trabou no por a mustra nada.

Esaki mester ta bon cla: si un aña y mei pasa nan a cuminsa cu un campaña clarito via medionan social, radio, television, foyeto pa parti cas pa cas etc., e ora ey lo tabatin visibelmente menos problema. Probablemente e grupo di trabou aki ta considera e problema como compleho, pa motibo cu tin cu mantene e ley, pero cu e instancianan concerni no por tuma decision tocante ken tin cu bay haci esaki.

E problema di cacho (molester di cacho cu ta cana los, incidente cu mordemento y similar) ta birando cada dia mas grandi, awor cu tur luga di acogida ta yen yen. E proverbio ‘mop cu cranchi habri’ ta aplicabel aki: e organisacionnan ta pasa mop, pero gobierno cu tin cu cera e cranchi ta wak den otro direccion y ta laga awa sigui basha.

Haciendo uzo di articulo 45 di reglamento di ordo y Conseho Insular, fraccion di M21 ta desea di haña contesta oral di parti di Colegio Ehecutivo riba e siguiente preguntanan den e siguiente reunion publico di Conseho Insular.

1. Dicon e investigacion di e ‘Grupo di Trabou di Cacho’ no ta publico?
2. Raad por haña un copia di e investigacion y su resultadonan?
3. Dicon no ta posibel pa tira bista den e investigacion di e ‘Grupo di Trabou di Cacho?
4. Raad por haña acceso pa tira un bista den e investigacion y su resultadonan?
5. Dicon na fin di luna di maart 2022 no a cuminsa mesora cu e campaña cu a priminti relaciona cu tenemento di cacho riba propio tereno?
6. Dicon durante tur e añanan despues di 10-10-10 no a cuminsa cu adaptacion di legislacion relaciona cu bienestar di bestia? Hopi biaha caba a confronta e coalicion actual cu esaki, den otro coalicionnan tambe.
7. Dicon no ta institui un asina yama ‘polis di bestia’, di manera cu por tuma accion inmediatamente?
8. Dicon Cuerpo Policial Hulanda Caribense no tin medio pa captura cacho y dicon nan no ta dispone di conocemento adecua relaciona cu comportacion di bestia?
9. Dicon Entidad Publico Boneiro no ta percura pa luga extra pa acogida, cu lo ta necesario ora cu cuminsa mantene ley den un forma corecto?
10. Dicon no ta investiga eventual incidentenan di mordemento, pero ta sali mesora for di e punto di bista cu ta e cacho ta e malhechor?