Dia 27 di sèptèmber ta selebrá pa di 106 dia internashonal di imigrante i refugiadonan. Papa Francisco den su mensahe pa e aña aki a proponé e tema: “Manera Hesus Kristu, obligá pa hui”.
E aña aki e atenshon ta riba e hendenan ku ta bandoná hogar pa biba na un otro kaminda den mes un país pa motibu entre otro situashon ekonómiko, persiguishon, kriminalidat, guera. Esaki ta trata di refugiadonan den propio país, desplasadónan. Aktualmente rònt mundu tin mas ku 41 mion desplasadónan interno. E reflekshon ta pa relashoná e tema di e aña aki ku e eksperensia di Hesus, ku tambe mester a hui ku su mayornan. E huida pa Egipto di Niño Hesus ku su famia eksaliá a eksperensiá e obligashon di bandoná nan país pa motibu di persiguishon. Tur dia nos por mira den medionan di komunikashon kuantu hende ta hui pa motibu di guera i persiguishon. Nos tin komo tarea, manera Kristu a bisa nos den Mateo 25:31-46, pa kuida, alimentá i bisti esunnan ku ta den situashonnan prekario den nos komunidat. Esaki ta konta tambe pa e refugiadonan i imigrantenan ku ta den kondishonnan vunerabel. Hesus ku tambe tabata un refugiado (Mateo 2:13-15) i a biba pafó di Su pais esta na Egipto ta bisa nos den Mateo, 25:31-46 ku nos: pa gana bida eterno nos mester tambe yuda, rekohé duna akohida na imigrantenan.
Caritas Boneiru kier hasi un yamada awe pa nos pone atenshon riba e tópiko aki pa nos sea konsiente ku na Boneiru tambe nos tin imigrantenan, refugiadonan lokal i internashonal ku ta biba den situashonnan menos faborabel. Nos por pensa riba e.o. nos rumannan ku ta biba den tenshon familiar, persiguishon dor di kriminalidat i situashon ekonómiko desfaborabel i ku ta buska refugio den adikshon i kriminalidat pa sali for di e situashon prekario ku nan ta biba aden. Tambe nos mester ta konsiente den ki situashon nos imigrantenan i refugiadonan ku ta laga nan pais i bin buska un bohío serka nos pa por tin un bibá ku pas i trankilidat sin niun klase di persiguishon. Na e momentu aki nos tin imigrantenan, ku pa motibu di e pandemia no tin salida pa risibí ayudo. Esaki pa motibu ku nan status di estadia no ta indifiní i ta pone ku nan no ta risibiendo yudansa manera otro suidadanonan afektá pa e pandemia aktual. E dia aki ta un dia tambe pa nos reflekshoná kon nos ta atendé ku nos imigrantenan aki na Boneiru, di moda ku nan por tin un bibá digno i ku prosperidat personal.
