Na Boneiro lo ta mas fasil pa habri un negoshi

Ta bira fásil pa habri un negoshi na Boneiru. Den 6 dia di trabou por haña un pèrmit di establesimentu. Esaki por awor paso for di promé di yüli ta bira posibel pa hasi e petishon online. Ora hasi un petishon online e proseso ta dura ménos largu. Entidat Públiko Boneiru (EPB) huntu ku Kamara di Komersio ke kòrta e tempu pa trata un pèrmit, pa asin’ei yuda esnan ku kier kuminsá un negoshi.

Aworakí un persona mester warda 8 siman pa haña su pèrmit. Esaki por afektá kon lihé i fásil un hende por kuminsá ku su negoshi na Boneiru. Hasiendo e periodo akí mas kòrtiku ta algu ku sektor privá a boga p’e pa hopi aña.

Banda di esaki Entidat Públiko di Boneiru ta eliminá tambe e paso pa empresarionan bai Registro Sivil i kumpra un prueba di inskripshon físikamente (bewijs van inschrijving). Asina por kumpli ku e eksigensia na momentu ku ta hasi su petishon pa un pèrmit. Awor e empresario ta hasi e parti di pago di su prueba di inskripshon online i Registro Sivil ta sòru pa pone e prueba huntu ku e petishon pa e departamento. Esaki ta pasonan pa hasi e henter e proseso di petishon pa un pèrmit di establesimentu mas fásil.

Diputado di desaroyo ekonómiko, Hennyson Thielman, a indiká ku gobièrnu di Boneiru a pone e vishon pa kita “opstákulo” for di prosesonan pa petishonnan por kana mas rápido i asina fasilitá nos komunidat ku un servisio moderno, simpel i rápido. Esaki tambe ta importante pa stimulá negoshi na Boneiru i pa fasilitá esun ku kier kuminsá un negoshi.

Ku e posibilidat digital Kolegio Ehekutivo ke logra ku petishonnan ta keda kla mucha mas lihé ku ántes. Esaki ta pone ku komunidat no mester warda hopi riba un kontesta i bida por drai muchu mas lihé. E opshon digital pa hasi petishon pa pèrmit akí tin e benefisio ku empresarionan no ta mará na orarionan di servisio di EPB pa entregá nan petishon. Banda di esei EPB ke stimulá pueblo pa tiki tiki no prent papel mas i a aseptá e reto pa fasilitá esaki den e wèpsait nobo. Pronto lo ta posibel pa hasi petishon pa otro pèrmitnan tambe digital manera entre otro un pèrmit di konstrukshon.