Riba ultimo dia durante e reunionnan di Asamblea General di Nacionnan Uni #UNGA78, Prome Minister Evelyn Wever-Croes a atende e conferencia di energia. Den su discurso, Prome Minsiter a expone e plannan ambicioso di Aruba pa transiciona na energia limpi. Aruba, pa prome biaha, tin su National Energy Policy, un plan concreto cu ta indica con pa atende cu e retonan di reduccion di emision di CO2.
E National Energy Policy ta wordo sostene door di tur stakeholder y su obhetivonan/metanan mas importante ta lo siguiente.
- Pa reduci e emision di carbon cu 45% pa aña 2030, manera estableci pa Nacionnan Uni, cu e meta pa limita e calentamento global cu 1.5 grado celsius.
- Pa cumpli cu e tratado di Paris 2050 y converti Aruba den un pais ‘carbon neutral’
- Pa aumenta e eficiencia energetico di tur negoshi, casnan y organisacionnan cu 15% di 2020 pa 2030
- Pa aumenta e uzo di energia renobabel cu 35%, pa loke ta produccion di coriente na 2024
- Pa aumenta cu 15% e uzo di vehicolanan electrico pa 2030.
Prome Minister a enfatiza: “Aruba ta ambicioso y comprometi pa realiza e metanan aki, y nos ta determina pa cumpli cu e acuerdo pa logra e metanan estableci na Paris”. Tambe el a expresa, cu su persona y mayoria di esnan di Small Island Development States (SIDS) ta sinti cu no tur pais ta asina comprometi. Esaki sigur ta creando un frustracion, mirando cu efectonan devastador di cambio climatico ta birando mas visibel y ta wordo sinti mas, y no tin tempo pa perde.
“Mi ta sumamente orguyoso di tur nos profesionalnan, pa nan esfuerso y dedicacion den crea un National Energy Plan pa Aruba. Nos a haya elogio di varios otro participante pa nos esfuerzonan y pa nos compromiso pa cumpli cu e plan. Cu determinacion nos lo sigi traha pa busca mas colaboracion pa logra nos metanan, Prome Minister a expresa”.
