Minister Maduro di Cultura na mesa di dialogo cu grupo di interes pa conserva nos herencia cultural:
Riba 1 di juli Minister Maduro a reflexiona hunto cu sr. Luc Alofs, sr. Clifford Rosa, sra. Nadia Dresscher y sra. Yolanda Richardson riba e di topico esclavitud na Aruba. E aña aki dia 1 di juli, a cumpli 159 aña cu Hulanda a aboli esclavitud den e colonia nan di Surinam y Antias Hulandes. Esclavitud y su impacto riba e presente, ta un topico actual den Reino Hulandes cu aki na Aruba tambe mester haya su debido atencion. Pa inicia e dialogo necesario na Aruba, Minister Maduro a reuni cu e grupo di interes aki cu ta haci investigacion riba e topico di esclavitud na Aruba.
E meta di e dialogo ta pa comparti cu comunidad informacion di e investigacionnan cu ya caba a wordo haci riba e topico di esclavitud na Aruba, sondea e posibilidad pa mas investigacion y tambe pa brinda informacion riba e dialogo cu ta tumando luga den Reino y e proceso cu mester tuma luga pa un dia por yega na ‘un acto di pidi despensa’ y na un forma con por brinda compensacion pa e dolor historico cu tambe a wordo biba na Aruba.
Ta importante pa nos ta conciente di kico tur a pasa, pa nos acepta cu esaki ta un parti scur di e historia comparti den Reino Hulandes pa asina nos por evita di haci e erornan aki contra humanidad cu awe ainda ta keda refleha den discriminacion y distincion. Un caminda largo ta cuminsa cu un solo stap y pesey Minister Maduro ta considera e reunion hiba cu e grupo di interes aki como un di e stapnan pa habri e dialogo riba esclavitud y su consecuencia na Aruba.
