Myriam Lavache desendiente di Haiti biba na Corsou ta pidi ayudo pa material medico pa Haiti

E situacion na Haiti ta uno cu tin varios pais den Caribe cu preocupacion. Ta conoci cu na Aruba, Boneiro y Corsou tin varios Haitiano ta biba y nan tambe ta preocupa cu e situacion cu tin na Haiti. Nos tur sa cu diasabra ultimo un temblor a destrosa un gran parti di Haiti tambe un mal tempo a pasa y haci e situacion pio di loke e tabata caba.
Myriam Lavache desendiente di Haiti cu ta biba na Corsou y ta secretaria di fundacion STIMA ta papia di e dolor cu e pais a keda aden. Segun Myriam Lavache na momento cu e la haya e noticia e tabata lago hopi doloroso unda cu por bisa cu e pais a bay bek na 2010. Esaki ta algo hopi doloroso pa tur e Haitianonan. Sinembargo Myriam a haya contacto cu un di su famianan y cu nan ta bon, pero na momento cu a tende cu e parti sur ta completamente kibra unda cu den cada bario cada pasa dos cas tin casnan cu a kibra. Hasta tambe tin hende cu a keda pega den nan cas y na unda cu te despues di un siman por a saca nan curpa for di e cas. E situacion ta caotico unda cu hendenan na Haiti ta sclama pa ayudo, dokternan ta man yen debi cu nan no tin material pa yuda y e comunidad ta yora debi cu nan no ta wordo yuda. E situacion ta doloroso pa tur e Haitianonan cu ta na Haiti , pero tambe pa esunnan cu ta biba pafo di e pais. Actualmente rond mundo tur Haitiano ta tratando di colecta tur loke cu nan por duna nan ayudo di un forma of otro pa asina wak con por yuda hende di diferente bario na Haiti.
Haiti ta pasando momentonan duro unda cu ainda no a recupera di 2010, nan a caba di pasa den e tristesa di e morto di nan presidente y awor e temblor ultimo y e yobida fuerte cu a pasa unda cu a haci un desaster na e pais.
Myriam Lavache ta secretaria di fundacion STIMA cu ta un fundacion cu ta traha pa integracion di stranheronan na Corsou. Na e momentonan aki ta trahando pa pone un campaña riba pia pa asina colecta articulonan pa manda pa Haiti. Tur persona cu kier duna un man y cu nan ta sinti cu nan curason ta bati pa e comunidad Haitiano cu ta pasando den un momento hopi doloroso tur ta bin bini. Actualmente tin mester hopi tipo di materia y no ta trata solamente di paña y cuminda so , pero mester di materialnan pa traha cu hende nan cu ta malo pa nan por keda trata.